سیکریٹری خارجہ سہیل محمود عہدے سے ریٹائر ہوگئے
وزارت خارجہ کے بیوروکریٹک سربراہ کے طور پر ساڑھے تین سال کی مدت ختم ہونے کے بعد سیکریٹری خارجہ سہیل محمود ریٹائر ہو گئے، انہوں نے خارجہ سروس میں 37 سالہ طویل عرصے تک ذمہ داریاں انجام دیں۔
ڈان اخبار میں شائع رپورٹ کے مطابق سہیل محمود کے ساتھیوں نے انہیں الوداعی تقریب میں مدعو کیا، دوسری جانب یہ بات بھی قابل ذکر ہے کہ حکومت نے انہیں ریٹائرمنٹ کے حوالے سےمطلع نہیں کیا۔
یہ بھی پڑھیں: سکریٹری خارجہ سہیل محمود نے ذمہ داریاں سنبھال لیں
بلجیئم، لگزم برگ اوریورپی یونین میں پاکستان کے سفیر اسد مجید خان نئے سیکریٹری خارجہ تعینات ہونے کی اطلاعات ہیں، یہ اطلاعات ایک ایسے موقع پر زیر گردش ہیں جب حکومت خارجہ پالیسی کے نئے اعلیٰ افسر کے نام کا اعلان کرنے والی ہے۔
رضا بشیر تارڑ اور معین الحق کے بعد سفیر عبدالمجید خان خارجہ سروس میں بی ایس-22 کے تیسرے اعلیٰ افسر ہیں۔
راجہ بشیر تارڑ اس عہدے کے لیے اہم امیدوار تصور کیے جا رہے تھے لیکن انہیں گزشتہ ماہ جاپان کے سفیر کے طور پر تعینات کردیا گیا تھا، ان کی پوسٹنگ سے یہ واضح ہوتا ہے کہ وہ اب اس عہدے کے لیے امیدوار نہیں ہیں۔
مزید پڑھیں: سہیل محمود بھارت میں پاکستانی ہائی کمشنر تعینات
دوسری جانب بیجنگ کے سفیر مومن الحق آئندہ 5 ماہ بعد ریٹائر ہوجائیں گے، سیکریٹری خارجہ کے طور پر ان کا انتخاب کرنے کا مطلب ہے کہ 5 ماہ بعد حکومت کو ایک اور سیکریٹری خارجہ کا تقرر کرنا ہو گا۔
سفیر عبدالمجید خان کو بھی مئی میں برسلز کے سفیر کے طور پر تعینات کیا گیا تھا اور وہ بھی 11 ماہ بعد ریٹائر ہوجائیں گے تاہم وہ سیکریٹری خارجہ کے طور پر بہترین انتخاب تصور کیا جا رہا ہے۔
عبدالمجید خان اس سے قبل امریکا کے سفیر کے طور پر ذمہ داریاں انجام دے چکے ہیں، ان کی شہرت میں اضافہ اس وقت ہوا تھا جب انہوں نے امریکا کے اسسٹنٹ سیکریٹری آف اسٹیٹ ڈونلڈ لو سے الوداعی ملاقات کی تھی جہاں اس سائفر کا استعمال کرتے ہوئے بعد میں سابق وزیراعظم عمران خان نے دعویٰ کیا تھا کہ ان کی اقتدار سے بے دخلی امریکی سازش کا نتیجہ تھی۔
یہ بھی پڑھیں: حکومت کا سہیل محمود کو نیا سیکریٹری خارجہ تعینات کرنے کا فیصلہ
انقرہ میں پاکستانی سفیر سائرس سجاد قاضی بھی سیکریٹری خارجہ کے عہدے کی دوڑ میں شامل ہیں تاہم بی ایس-21 میں ہونے کی وجہ ان کے اس عہدے پر فائز کرنے کے بہت کم امکانات ہیں اور وہ کچھ ہی ہفتوں میں ہیڈ کوارٹر واپس آرہے ہیں، وفاقی سیکریٹری عمومی طور پر بی ایس-22 کے افسر کو تعینات کیا جاتا ہے۔
لائیو ٹی وی