پاکستان سے خشک مرچوں کی پہلی کھیپ چین روانہ
پاکستان نے زرعی اجناس کی برآمدات بڑھانے کی مہم کے تحت 19 دسمبر کو خشک مرچوں کی پہلی کھیپ چین روانہ کر دی گئی ہے۔
ڈان اخبار کی رپورٹ کے مطابق نگراں وزیراعلیٰ سندھ ریٹائرڈ جسٹس مقبول باقر نے نے پاکستان کی جانب سے خشک مرچوں کی پہلی کھیپ کی برآمد کو خوش آئند قرار دیا ہے۔
انہوں نے کہا کہ یہ افتتاحی کھیپ پاکستان کی زرعی برآمدات میں ایک اہم پیشرفت ہے اور اس سے دونوں ممالک کے درمیان تجارت کو مزید فروغ ملے گا۔
پاک چین اقتصادی راہداری (سی پیک) کے زرعی منصوبے کے تحت شپمنٹ کی تقریب سے خطاب کرتے ہوئے وزیراعلیٰ سندھ نے کہا کہ سندھ نے قومی سطح پر مرچوں کی کل پیداوار میں تقریباً 80 فیصد حصہ ڈالا، جس کی مقدار ایک لاکھ 44 ہزار ٹن ہے۔
تقریب میں چین کے قونصل جنرل نے بھی شرکت کی جب کہ وفاقی وزیر خوراک اور چینی سفیر کے ریکارڈ شدہ پیغامات اسکرین پر دکھائے گئے۔
نگراں وزیر اعلیٰ نے مزید کہا کہ یہ اہم کامیابی لیٹونگ فوڈ کمپنی لمیٹڈ کی شاندار کاوشوں سے ممکن ہوئی، پاکستان اور چین کے درمیان تجارتی تعلقات میں ایک نئے دور کا آغاز ہواہے۔
انہوں نے لیٹونگ فوڈ کمپنی لمیٹڈ کو مبارکباد پیش کی اور چین کے اندر پاکستانی اشیاء کی خاطر خواہ مارکیٹ بنانے میں چینی حکومت کی غیر متزلزل حمایت پر اظہار تشکر کیا۔
ان کا کہنا تھا کہ یہ کامیابی نہ صرف ہمارے برآمد کنندگان کی صلاحیتوں کو ظاہر کرتی ہے بلکہ پاکستانی اور چینی کاروباری اداروں کے درمیان مزید تعاون کے امکانات کو بھی اجاگر کرتی ہے۔
ریٹائرڈ جسٹس مقبول باقر نے کہا کہ ملک میں تقریباً ایک لاکھ 44 ہزار ٹن پیداوار کے ساتھ ایک لاکھ 43 ہزار ایکڑ سے زائد رقبے پر مرچیں اگائی جاتی ہیں، انہوں نے کہا کہ سندھ قومی پیداوار میں تقریباً 80 فیصد حصہ ڈالتا ہے، سندھ میں مرچ کی کاشت کرنے والے بڑے اضلاع عمرکوٹ، بدین، میرپورخاص، ٹھٹھہ، جامشورو، سانگھڑ، ٹنڈو الہ یار، ٹنڈو محمد خان، دادو اور شکارپور ہیں۔
لائیو ٹی وی