آغا علی کا گلوکاری کا آغاز، گانا ریلیز کردیا
مقبول اداکار و ٹی وی میزبان آغا علی نے گلوکاری شروع کرتے ہوئے نیا گانا ریلیز کردیا۔
آغا علی نے ’سچ ہے‘ کے نام سے نیا گانا جاری کردیا، جس میں صحیفہ جبار ان کے ساتھ دکھائی دیں۔
اداکار و گلوکار نے گانے کی ویڈیوز انسٹاگرام اور یوٹیوب پر شیئر کیں، جہاں صارفین نے ان کے گانے پر تبصرے بھی کیے۔
’سچ ہے‘ کے عنوان سے جاری کیے گئے گانے کی شاعری بھی اداکار نے خود لکھی ہے جب کہ اس کی کمپوزیشن بھی انہوں نے خود ہی ترتیب دی ہے۔
گانے کی ویڈیو کی ہدایات احمر سہیل نے دی ہیں، ویڈیو میں ان کے ساتھ صحیفہ جبار پیار کرتی دکھائی دیتی ہیں۔
آغا علی کی جانب سے گانے کی ویڈیو کو شیئر کیے جانے کے بعد صارفین نے اس پر دلچسپ تبصرے کیے اور لکھا کہ وہ گانا گا رہے ہیں یا کوئی سبق سنا رہے ہیں؟
اداکار کی جانب سے 25 جنوری کو یوٹیوب پر ریلیز کیے گانے کو چار دن میں محض 3 ہزار بار ہی دیکھا گیا تھا۔
آغا علی ماضی میں بتا چکے ہیں کہ انہیں گلوکاری کا شوق رہا ہے جب کہ وہ شاعری بھی کرتے رہے ہیں۔
اداکاری اور ٹی وی میزبانی میں نام کمانے والے اداکار کے گانے کو کوئی خاص پذیرائی نہیں ملی، تاہم بعض مداحوں نے ان کے نئے انداز کو بھی سراہا۔
لائیو ٹی وی