پاکستان، لاہور میں ہوں، راکھی ساونت کی ویڈیو وائرل
متنازع بھارتی اداکارہ راکھی ساونت کی ایک اور ویڈیو سوشل میڈیا پر وائرل ہو رہی ہے، جس میں وہ دعویٰ کرتی دکھائی دیتی ہیں کہ وہ پاکستان کے شہر لاہور میں موجود ہیں۔
سوشل میڈیا پر وائرل مختصر ویڈیو میں اداکارہ دعویٰ کرتی دکھائی دیتی ہیں کہ وہ پنجاب کے دارالحکومت لاہور کے نجی ہوٹل کے باہر موجود ہیں۔
ویڈیو میں وہ کہتی دکھائی دیتی ہیں کہ ہر کوئی ان کی تصاویر اور ویڈیوز بنا رہا ہے لیکن ہانیہ عامر اور وسیم اکرم ان کے پاس نہیں آئے۔
اداکارہ ویڈیو میں شکایت کرتی دکھائی دیتی ہیں کہ اب انہیں کون لینے آئے گا؟ انہیں حلوہ پوری کھلانے کی بڑی پیش کش ہو رہی تھیں۔
ویڈیو میں راکھی ساونت کسی سے فون پر بات کرتے ہوئے دعویٰ بھی کرتی ہیں کہ ان کے پاس ہانیہ عامر کا فون آگیا اور پھر وہ فون پر بات کرتے ہوئے بار بار ہانیہ عامر کا نام بھی لیتی دکھائی دیتی ہیں۔
راکھی ساونت فون پر بات کرتے دوران ہانیہ عامر کا نام لے کر انہیں بتاتی ہیں کہ وہ دو گھنٹے تک ایئرپورٹ کھڑی رہیں اور اب وہ لاہور کے نجی ہوٹل کے باہر کھڑی ہیں۔
اداکارہ فون پر بات کرتے ہوئے کہتی ہیں کہ اگر ہانیہ عامر ان کے پاس آئیں تو ساتھ میں وسیم اکرم کو بھی لے کر آئیں، کیوں کہ انہوں نے انہیں کہا تھا کہ وہ جب بھی پاکستان آئیں گی وہ ان کا سواگت کریں گے۔
ویڈیو میں راکھی ساونت فون پر بات کرتے ہوئے حلوہ پوری کا مطالبہ بھی کرتی ہیں اور کہتی ہیں کہ سب انہیں کہ رہے تھے کہ انہیں حلوہ پوری کھلایا جائے گا۔
بعد ازاں راکھی ساونت فون کو بند کرکے کہتی ہیں کہ جن جن کو ان سے ملنا ہے، وہ ان سے ملنے کےلیے ہوٹل آجائیں، وہ لاہور میں ہی ہیں۔
اس سے قبل گزشتہ ہفتے انہوں نے ایک اور ویڈیو شیئر کی تھی، جس میں انہوں نے دعویٰ کیا تھا کہ وہ پاکستان پہنچ گئیں۔
راکھی ساونت نے ویڈیو شیئر کرتے ہوئے بہت سارے بیگز دکھائے تھے اور دعویٰ کیا تھا کہ وہ لاہور پہنچ گئیں۔
راکھی ساونت گزشتہ چند دنوں سے پاکستانی اداکاراؤں کو ڈانس چیلنج دینے، ہانیہ عامر سے ملنے کے لیے پاکستان آنے اور پاکستانی لڑکی سے شادی کرنے کے دعووں کی وجہ سے خبروں میں ہیں۔
دو دن قبل ہی پاکستانی اداکار و ماڈل دودی خان نے راکھی ساونت کو شادی کی پیش کش کی تھی، جس کے جواب میں اداکارہ نے بھی بھارتی میڈیا کو جاری کیے گئے آڈیو بیان میں پاکستانی اداکار کی پیش کش قبول کرلی تھی۔
لائیو ٹی وی