سیف علی خان حملے کے بعد پہلی بار منظر عام پر آگئے
بولی وڈ اداکار سیف علی خان چاقو حملے کے بعد پہلی مرتبہ عوامی سطح پر نظر آئے، وہ اپنی اگلی فلم کی پروموشن کرتے دکھائی دیئے۔
’ٹائمز آف انڈیا‘ کے مطابق بولی وڈ اداکار سیف علی خان نے ممبئی میں اپنی آنے والی نیٹ فلکس فلم کی تشہیر کے لیے فلم کی دیگر اسٹار کاسٹ کے ساتھ تقریب میں شرکت کی۔
اداکار کی اگلی فلم ’جیول تھیف-دی ہائیسٹ بگنز‘ نیٹ فلکس پر جلد ریلیز ہونے والی ہے۔
سدھارتھ آنند کی پروڈکشن میں بننے والی فلم میں سیف علی خان کے ساتھ جے دیپ اہلاوت، نکیتا دتہ اور کنال کپور بھی نظر آئیں گے۔
فلم کے ٹریلر لانچ کے موقع پر میڈیا سے بات کرتے ہوئے انہوں نے کہا کہ یہاں آکر اور آپ کے سامنے کھڑے ہو کر بہت اچھا لگ رہا ہے۔
ان کا کہنا تھا کہ میں اس فلم کے حوالے سے بہت پرجوش ہوں۔
اس موقع پر اداکار نیلے جینز اور شرٹ میں صحت مند نظر آرہے تھے، تاہم ان کے بائیں ہاتھ میں بینڈیج صاف دیکھی جا سکتی تھی۔
یاد رہے کہ سیف علی خان پر 16 جنوری کی رات تقریباً ڈھائی بجے حملہ کیا گیا تھا، جس میں وہ شدید زخمی ہوگئے تھے۔
حملے کے بعد فوری طور پر انہیں لیلاوتی ہسپتال لے جایا گیا تھا، جہاں ان کی ایمرجنسی میں سرجری کی گئی تھی۔
اداکار کو پانچ دن بعد ہسپتال سے چھٹی دے دی گئی تھی، تاہم ان کے گھر میں چوری کی غرض سے داخل ہونے والا مبینہ بنگلا دیشی شہری قید میں ہے۔
لائیو ٹی وی