ابھی تک پسند کا کردار نہیں ملا، حرا سومرو کا شکوہ
معروف اداکارہ حرا سومرو نے ڈراموں میں اپنے کرداروں کے حوالے سے شکوہ کیا ہے کہ انہیں آج تک اپنی پسند کا کردار نہیں ملا۔
حرا سومرو نے ’دنیا نیوز‘ کے شو میں شرکت کی، جہاں انہوں نے کیریئر اور ذاتی زندگی سے متعلق مختلف پہلووں پر بات کی۔
انہوں نے بتایا کہ اداکار ی سے زیادہ مشکل کام وی لاگنگ کرنا ہے۔
ان کا کہنا تھا کہ میں نے وی لاگنگ کا آغاز کیا تھا، تاہم تین ویڈیوز بناکر ہی احساس ہوگیا کہ یہ مشکل ترین کام ہے، لہٰذا اسے چھوڑ دیا۔
انہوں نے بتایا کہ زندگی میں بہت سی باتیں ایسی ہوتی ہیں، جنہیں ہم کہنا چاہتے ہیں لیکن کہہ نہیں پاتے۔
اداکارہ کے مطابق انہوں نے انڈسٹری میں جس بھی ڈرامے میں کام کیا وہ کبھی فلاپ نہیں ہوا۔
ان کا پُرشکوہ انداز میں اپنے کرداروں کے حوالے سے کہنا تھا کہ لوگ عزت تو دیتے ہیں مگر ابھی تک ویسا کام یا کردار نہیں ملا جو دل کے قریب ہو۔
اداکارہ کا کہنا تھا کہ شاید لوگوں کو ابھی تک مجھ پر اعتبار نہیں، تاہم ان کا کہنا تھا کہ مجھے یقین ہے کہ میرا وقت ضرور آئے گا۔
انہوں نے اپنی زندگی کے حوالے سے بات کرتے ہوئے کہا کہ مجھے غموں کا سامنا رہا ہے۔
حرا سومرو کا مزید کہنا تھا کہ اگر آپ کو زندگی میں کہیں پہنچنا ہے تو غم ہونا ضروری ہے۔
اداکارہ نے خواہش کا اظہار کیا کہ موقع ملا تو رومانوی کردار نبھانا چاہوں گی۔
واضح رہے کہ حرا سومرو زیادہ تر معاون کرداروں میں دکھائی دیتی ہیں، وہ مقبول ڈرامے ’تیرے بن‘ میں مریم کے کردار میں دکھائی دی تھیں۔
مذکورہ ڈرامے میں انہوں نے ہیرو کی بہن کا کردار ادا کیا تھا اور ان کی اداکاری کو بہت سراہا گیا تھا۔
اداکارہ یہ انکشاف بھی کرچکی ہیں کہ انہوں نے والد سے چھپ کر ابتدائی طور پر ماڈلنگ شروع کی تھی، جس پر والد ان سے ایک طویل عرصے تک ناراض رہے تھے۔
لائیو ٹی وی