جہلم میں 4 رشتے داروں کو قتل کرکے بھاگنے والے 5 برطانوی شہری ایئرپورٹ پر گرفتار
وفاقی تحقیقاتی ادارے (ایف آئی اے) کے امیگریشن حکام نے سیالکوٹ ایئرپورٹ پر پاکستانی نژاد 5 برطانوی شہریوں کو اس وقت گرفتار کر لیا جب وہ جہلم میں اپنے 4 قریبی رشتے داروں کو قتل کرنے کے چند گھنٹوں کے اندر اندر ملک سے فرار ہونے کی کوشش کر رہے تھے۔
ڈان اخبار کی رپورٹ کے مطابق ضلع جہلم میں منگلا کینٹ پولیس کے علاقے بھرت گاؤں میں خاندانی جھگڑے کے نتیجے میں ابرار حسین، مطیع الدین، عدیلہ کنول اور سکینہ ارشد کو قتل کردیا گیا۔
ذرائع نے بتایا کہ پولیس نے فوری طور پر کارروائی کی اور قتل کے چند گھنٹوں کے اندر ہی امیگریشن ’اسٹاپ لسٹ‘ پر مشتبہ افراد کی تفصیلات اپ لوڈ کر دیں۔
حکام کا کہنا ہے کہ ملزمان کو جمعہ کی رات ڈھائی بجے پرواز ای کے 619 میں سوار ہونا تھا، تاہم اس سے قبل ہی ان کی تفصیلات امیگریشن کے آئی بی ایم ایس سسٹم تک پہنچ چکی تھیں، جس کے بعد انہیں روکا گیا اور منگلا پولیس کے حوالے کر دیا گیا۔
برطانوی پاسپورٹ رکھنے والے ملزمان کی شناخت 25 سالہ مجتبیٰ ولد کرامت، 22 سالہ مرتضیٰ ولد کرامت، محمد ہارون ولد بشارت، محمد ظہیر اور چوہدری فیصل کے ناموں سے ہوئی۔
شکایت گزار دلاور حسین نے پولیس کو بتایا کہ ان کے اہل خانہ شب برات منانے گاؤں میں ان کے گھر پر جمع ہوئے تھے، جمعرات کی شام 7 بج کر 55 منٹ پر فیصل ولد غلام شبیر، جمیل حسین، ظہیر حسین، مرتضیٰ حسین، مجتبیٰ حسین، ہارون بشارت، یاسر سلیم اور تین نامعلوم افراد پستول اور بندوقوں سے لیس ہوکر ان کے گھر میں داخل ہوئے اور اہل خانہ پر فائرنگ کی۔
دلاور نے بتایا کہ فیصل نے اپنی والدہ سکینہ ارشد کو گولی ماری، ظہیر نے اپنے بہنوئی ابرار حسین کو گولی ماری، جب کہ ہارون نے اپنی بہن عدیلہ ولد ابرار حسین کو گولی ماری۔
شکایت کنندہ نے الزام عائد کیا کہ ملزم جمیل حسین نے اپنے بھائی مطرشید کو بھی مارا۔
شکایت گزار کے مطابق سکینہ ارشد، ابرار حسین، عدیلہ اور مطرشید موقع پر ہی جاں بحق ہوگئے، جب کہ انہوں نے پناہ لے کر اپنی جان بچائی۔
شکایت کنندہ کا کہنا تھا کہ ملزمان کو چند روز قبل ہونے والے جھگڑے کی وجہ سے بغض تھا اور قتل کے واقعے کے پیچھے ماضی کے کچھ اختلافات بھی تھے۔
ڈی پی او طارق عزیز سندھو اور منگلا پولیس نے موقع پر پہنچ کر تفتیش شروع کردی۔
پولیس کے مطابق ملزم کے خلاف پی پی سی کی دفعہ 302، 452، 148 اور 149 کے تحت ایف آئی آر درج کی گئی ہے۔
لائیو ٹی وی