درخواست فارم میں غلط انگریزی لکھنے پر میرا پر برطانیہ داخلے پر پابندی لگی، بہن میرا
اداکارہ میرا کی بہن شائستہ عباس کے مطابق ان کی بہن نے ویزا درخواست فارم میں غلط انگریزی لکھی تھی، اس وجہ سے بھی ان پر برطانیہ میں داخلے پر 10 سال کی پابندی عائد کی گئی۔
اداکارہ میرا کی والدہ نے بھی گزشتہ ہفتے انکشاف کیا تھا کہ ان کی بیٹی پر برطانیہ میں داخلے پر 10 سال کی پابندی عائد تھی جو کہ اب مکمل ہوچکی۔
اب اداکارہ کی بہن نے اس حوالے سے مزید تفصیلات بتاتے ہوئے بتایا ہے کہ ان کی بہن نے ویزا درخواست فارم میں غلط انگریزی لکھ دی تھی، جس وجہ سے بھی ان پر پابندی لگی۔
شائستہ عباس کا کہنا تھا کہ میرا بہن اور بھائیوں میں سب سے زائد العمر ہیں اور انہوں نے انہیں والدین کی طرح پالا۔
ان کا کہنا تھا کہ میرا نے خاندان کے لیے بہت بڑی قربانیاں دیں اور انہیں بچپن میں ہی لندن منتقل کردیا تھا۔
اداکارہ کی بہن کے مطابق ان کے والد کئی دہائیاں قبل انتقال کر گئے تھے، والد کی وفات کے بعد میرا نے گھر کے اخراجات اٹھائے اور تمام بہن اور بھائیوں کو اچھی تعلیم کے لیے لندن منتقل کیا۔
ان کے مطابق میرا نے انہیں تعلیم مکمل ہونے کے بعد پاکستان آکر شوبز انڈسٹری جوائن کرنے کا بھی کہا لیکن ان کا کوئی شوق نہیں تھا۔
انہوں نے میرا کی قربانیوں کا اعتراف کرتے ہوئے بتایا کہ اداکارہ نے ہی انہیں لندن میں گھر دلوایا، جہاں وہ اور ان کے بھائی رہے اور اچھی تعلیم حاصل کی۔
ان کے مطابق 10 سال قبل درخواست فارم میں میرا کی جانب سے غلط انگریزی لکھنے کی وجہ سے بھی ان پر برطانیہ میں داخلے پر پابندی لگائی گئی تھی۔
لائیو ٹی وی