دوسرے شخص کی ذمہ داری اٹھانے کے قابل ہونے پر شادی کرلوں گا، ثمر جعفری
ابھرتے ہوئے اداکار ثمر جعفری نے کہا ہے کہ مالی اور ذہنی پختگی کے بعد جب وہ کسی دوسرے شخص کی ذمہ داری اٹھانے کے قابل ہوجائیں گے تب وہ شادی کے بندھن میں بندھ جائیں گے۔
ثمر جعفری نے حال ہی میں دیے گئے انٹرویو میں کیریئر سمیت دیگر معاملات پر کھل کر بات کی۔
ایک سوال کے جواب میں انہوں نے بتایا کہ وہ خود کو ابھی غیر مستحکم سمجھتے ہیں، اس وقت ان کے لیے کسی کی محبت نہیں بلکہ اپنی خواہشات کو مکمل کرنا اہم ہے۔
ساتھ ہی انہوں نے محبت کو بھی اہم قرار دیا لیکن واضح کیا کہ شاید وہ اتنے میچوئر نہیں بنے کہ کسی دوسرے شخص کے جذبات کی قدر کر سکیں۔
اداکار کا کہنا تھا کہ وہ اچھے پارٹنر کی اہمیت کو سمجھتے ہیں اور ان کا بھی یہی خیال ہے کہ زندگی میں آگے بڑھنے کے لیے اچھے روحانی ساتھی کا ہونا ضروری ہے۔
ثمر جعفری نے بتایا کہ انہیں اداکاری کے ساتھ ساتھ گلوکاری اور شاعری کرنے کا بھی شوق ہے اور وہ زیادہ تر رومانوی شاعری لکھتے ہیں۔
ان کا کہنا تھا کہ ان کی زندگی میں کوئی شخص نہیں ہے، وہ ان افراد کے لیے رومانوی شعر لکھتے ہیں جن کے دل ٹوٹے ہیں۔
شادی سے متعلق پوچھے گئے سوال پر اداکار نے بتایا کہ وہ اس معاملے پر اپنے قریبی دوستوں سے بھی بحث کر چکے ہیں اور ان کے خیالات واضح ہیں۔
اداکار کے مطابق وہ اس بات پر یقین رکھتے ہیں جب کہ وہ کسی دوسرے شخص کی ذمہ داری اٹھانے کے قابل ہوجائیں گے، تب ہی وہ شادی کریں گے۔
ثمر جعفری کا کہنا تھا کہ جذباتی، روحانی، مالی اور فیصلہ سازی میں مضبوط ہونے کے بعد ہی وہ شادی کریں گے۔
ان کے مطابق ابھی ان کی توجہ کیریئر بنانے پر ہے، جب انہیں لگے گا کہ وہ دوسرے شخص کے جذبات کو سمجھنے کے قابل ہوچکے ہیں، تب ہی وہ شادی کریں گے۔
اداکار کا کہنا تھا کہ ان کی سوچ ہے کہ وہ اپنے شریک حیات کو ان کی اپنی مرضی کے مطابق زندگی گزارنے دیں گے، اس لیے جب وہ کسی کی ضروریات اور جذبات کو سمجھنے اور انہیں برداشت کرنے کے قابل ہوجائیں گے تو شادی کرلیں گے۔
لائیو ٹی وی