کینسر میں مبتلا انجلین ملک کی دعاؤں کی درخواست
کینسر میں مبتلا اداکارہ، ماڈل، پروڈیوسر و ہدایت کارہ انجلین ملک نے مداحوں سے دعاؤں کی درخواست کردی۔
اداکارہ نے 10 مارچ کو انسٹاگرام پر اپنی نئی تصویر شیئر کرتے ہوئے مداحوں اور ساتھیوں سے دعاؤں کی التجا بھی کی اور بتایا کہ انہیں آج دعاؤں کی سخت ضرورت ہے۔
اداکارہ نے پوسٹ میں بتایا کہ کینسر کے علاج کے سلسلے میں وہ اہم پروسیجر سے گزرنے والی ہیں، جس کے لیے انہیں خیر خواہوں کی دعاؤں کی درخواست ہے۔
انہوں نے لکھا کہ وہ پروسیجر کے لیے ہسپتال میں تیاریاں کر رہی ہیں۔
انجلین ملک نے واضح نہیں کیا کہ وہ کس طرح کے پروسیجر سے گزریں گی، تاہم ممکنہ طور پر اداکارہ کی سرجری کی گئی ہوگی۔
دعاؤں کی درخواست کرنے کے ایک دن بعد اداکارہ نے انسٹاگرام اسٹوریز میں نیک خواہشات اور دعائیں کرنے والی شوبز شخصیات کی پوسٹس کو بھی شیئر کیا لیکن انہوں نے ایک دن گزر جانے کے باوجود پروسیجر کے بعد کی صورتحال سے متعلق کوئی معلومات فراہم نہیں کی۔
اس سے قبل انجلین ملک نے گزشتہ ہفتے بتایا تھا کہ ان کی کیموتھراپی کے تین سیشن مکمل ہوچکے۔
انہوں نے یہ بھی نہیں بتایا کہ وہ کینسر کا علاج کہاں کروا رہی ہیں، تاہم وہ علاج کے دوران متحدہ عرب امارات (یو اے ای) کی ریاست دبئی سے تصاویر اور ویڈیوز شیئر کرتی رہتی ہیں۔
انجلین ملک نے فروری میں اپنی جیولری کلیکشن متعارف کراتے ہوئے سر کے بالوں کے بغیر اپنی تصاویر شیئر کرتے ہوئے بتایا تھا کہ ان میں کینسر کی تشخیص ہوئی ہے اور ان کا علاج جاری ہے۔
بعد ازاں اداکارہ کو سر کے بالوں کے بغیر ہی فیشن شو میں کیٹ واک کرتے بھی دیکھا گیا۔
اب اداکارہ نے کیموتھراپی سیشن کے دوران کھچوائی گئی تصاویر شیئر کرتے ہوئے مداحوں کو بیماری سے متعلق اپڈیٹ دی۔
اداکارہ نے بتایا کہ 6 مارچ تک ان کے کیموتھراپی کے تین سیشن مکمل ہوچکے تھے اور ان کے مزید سیشن ہونے ہیں۔
انجلین ملک نے اگرچہ بتایا ہے کہ ان کا کینسر کا علاج جاری ہے، تاہم انہوں نے اس متعلق مزید کوئی معلومات فراہم نہیں کی کہ انہیں کس طرح کا کینسر لاحق ہوا ہے اور بیماری کون سی اسٹیج پر ہے۔
لائیو ٹی وی