خیبرپختونخوا: سوات میں بھی پیکا کے تحت پہلا مقدمہ درج کر لیا گیا
خیبرپختونخوا کے ضلع سوات میں دی پریوینشن آف الیکٹرانک کرائمز (پیکا) ایکٹ کے تحت پہلا مقدمہ درج کر لیا گیا۔
ڈان نیوز کے مطابق پولیس نے بتایا کہ سیدو شریف پولیس اسٹیشن میں مقدمہ اکبر علی کے خلاف جعلی آئی ڈی سے پوسٹ اپلوڈ کرنے پر درج کیا گیا۔
پولیس کا کہنا تھا کہ ملزم اکبر کا تعلق ضلع شانگلہ سے ہے اور سیدو شریف ہسپتال میں ٹیکنیشن کی پوسٹ پر تعینات ہے۔
پولیس کے مطابق ملزم نے ایک جعلی آئی ڈی سے ہسپتال ملازمین کے خلاف پوسٹ کی تھی۔
واضح رہے کہ ملک بھر میں پیکا قانون کے تحت مقدمات درج کرنے کا سلسلہ جاری ہے۔
آج وفاقی تحقیقاتی ادارے (ایف ائی اے) نے اسلام آباد سے تعلق رکھنے والے صحافی وحید مراد کی پیکا قانون کے مقدمے میں گرفتاری ظاہر کرتے ہوئے انہیں عدالت میں پیش کر دیا تھا، عدالت نے 10 روزہ جسمانی ریمانڈ کی استدعا پر انہیں 2 روز کے لیے ایف ائی اے کے حوالے کر دیا تھا۔
20 مارچ کو ایف آئی اے نے نامور صحافی اور سما ٹی وی کے سابق ڈائریکٹر نیوز فرحان ملک کو کراچی سے گرفتار کرلیا تھا۔
21 مارچ کو کراچی کی جوڈیشل مجسٹریٹ شرقی کی عدالت نے صحافی فرحان ملک کو 4 روزہ جسمانی ریمانڈ پر وفاقی تحقیقاتی ادارے کے حوالے کردیا تھا۔
گزشتہ روز کراچی میں جوڈیشل مجسٹریٹ شرقی کی عدالت نے صحافی فرحان ملک کو 14 روزہ عدالتی ریمانڈ پر جیل بھیجتے ہوئے ان کی درخواست ضمانت پر نوٹس جاری کردیے تھے۔
26 مارچ (آج) کراچی میں جوڈیشل مجسٹریٹ ملیر کی عدالت نے مبینہ کال سینٹر کے ذریعے غیر ملکیوں سے فراڈ کے نئے مقدمے میں صحافی فرحان ملک کو 5 روز جسمانی ریمانڈ پر ایف آئی اے کے حوالے کردیا تھا۔
لائیو ٹی وی