ہندوستان: ہُدہُد سے ہلاکتوں کہ تعداد 41 ہو گئی
بھوبھنیسور: ہندوستان کے مشرقی ساحل پر گزشتہ ہفتے آنے والے طوفان میں ہلاکتوں کی تعداد 41 ہو گئی ہے جہاں اب تک ڈیڑھ لاکھ سے زائد افراد گھر بار سے محروم ہو چکے ہیں۔
حکام بجلی، ٹرانسپورٹ اور مواصلاتی نظام کی بحالی میں مصروف ہیں تاہم طوفان تھمنے کے باوجود انہیں شدید مشکلات کا سامنا ہے۔
ریاست آندھرا پردیش اور اڑیسہ کے ساحلی علاقوں میں آنے والے طوفان سے ہزاروں لکڑی اور مٹی کے گھر نیست و نابود ہو گئے جبکہ ہزاروں ایکڑ پر پھیلی گنے، چاول اور کیلے کی فصل تباہ ہو گئی۔
آندھرا پردیش میں ڈیزاسٹر مینجمنٹ ڈپارٹمنٹ کے سربراہ اے آر سکومار نے ہفتے کو رائٹرز کو بتایا کہ 60 فیصد متاثرہ علاقوں میں بجلی بحال کی جا چکی ہے اور آئندہ تین سے چار دنوں میں تمام علاقوں میں بجلی بحال کر دی جائے گی۔
اڑیسہ میں اب تک ہلاک ہونے والوں کی تعداد تین ہی ہے تاہم آندگرا پردیش میں مرنے والوں میں تعداد بڑھ کر 38 تک پہنچ گئی ہے۔
ہُدہُد کے نتیجے میں پڑوسی ممالک بنگلہ دیش اور نیپال میں بھی تباہی آئی اور بھاری جانی و مالی نقصان ہوا۔
نیپال میں سیاحت کے لیے مشہور انوپرنا سرکٹ میں شدید برف باری کے نتیجے میں کم از کم 30 افراد ہلاک ہو گئے۔
لائیو ٹی وی