لاہور: پیرس ایئرپورٹ کی انتظامیہ نے 'کرفیو کے گھنٹوں' کی خلاف ورزی کرنے پر پاکستان انٹرنیشنل ایئرلائنز پر 40 ہزار یورو کا جرمانہ عائد کردیا ہے۔

ایک خط میں پیرس کی انتظامیہ نے یہ رقم ادا کرنے کی مانگ کی ہے۔ جرمانہ گزشتہ ستمبر لاہور سے پیرس جانے والی ایک پرواز کے دوران کرفیو کے گھنٹوں (رات 12 سے صبح چھ) کی خلاف ورزی کرنے پر عائد کیا گیا۔

ذرائع کے مطابق پیرس ایئرپورٹ کی انتظامیہ نے پی آئی اے کو خبردار کیا ہے کہ وہ مستقبل میں قوانین پر عمل کریں اور اس قسم کی خلاف ورزیوں سے گریز کریں۔

پی آئی اے کے ترجمان نے اس پرواز کے بارے میں کہا کہ یہ ایک تکنیکی مسئلے کے باعث تاخیر کا شکار ہوئی تھی۔

انہوں نے بتایا کہ اس تاخیر کے باعث پرواز کو کرفیو کے گھنٹوں کے دوران لینڈ اور ٹیک آف کروانا پڑا۔

انہوں نے کہا کہ پی آئی اے مینجمنٹ پیرس میں اپنے آفس مینیجر سے رابطے میں ہے اور امید ہے کہ یہ جرمانہ معاف کردیا جائے گا کیوں کہ ایسا ہونا 'ایک معمول کی بات ہے'۔

دوسری جانب پی آئی اے سعودی سول ایوی ایشن کے 50 لاکھ سعودی ریال کے واجبات ادا کرنے میں ناکام رہا ہے ۔

فروری سے واجب ہونی والی اس رقم کے بارے سعودی حکام کا مطالبہ ہے کہ انہیں یہ رقم جلد از جلد فراہم کردی جائے۔

گزشتہ سال بھی سعودی حکام نے پی آئی اے پر پروازوں میں تاخیر اور منسوخی پر جرمانہ عائد کیا تھا۔

پی آئی اے ترجمان کے مطابق یہ واجبات آئندہ ہفتے ادا کردیے جائیں گے جبکہ حج آپریشنز کے دوران بیڑے میں کمی کے باعث دشواری کا سامنا رہا تاہم اس مرتبہ ایسا نہیں ہوگا۔