لاہور: پنجاب یونیورسٹی کے 29 طالب علموں کو جہاں ایک جانب پرتشدد واقعے میں مبینہ طور پر ملوث ہونے پر یونیورسٹی سے معطل کردیا گیا، وہیں دوسری جانب انٹیلی جنس ایجنسیوں نے یونیورسٹی کے ایک طالب علم کو کالعدم تحریک طالبان پاکستان( ٹی ٹی پی) سے مبینہ تعلق کے الزام میں حراست میں لے لیا۔

یونیورسٹی کے ہیلے کالج آف کامرس کے طالب علم عتیق آفریدی نے گزشتہ جمعے ایک ساتھی طالب علم کو چھوٹے سے مسئلے پر مبینہ طور پر تشدد کا نشانہ بنایا تھا۔

یونیورسٹی کے چیف سیکیورٹی آفیسر میجر (ر) سلیم کا کہنا تھا کہ جب تشدد کے واقعے پر عتیق کو یونیورسٹی کے اعلیٰ حکام کے سامنے پیش کیا گیا تو اس نے ٹی ٹی پی کے نیک محمد اور بیت اللہ محسود کو اپنا رہنما بتاتے ہوئے کہا کہ وہ ان کی جان کا بدلہ لے گا۔

انہوں نے کہا کہ پختون ایجوکیشنل ڈویلپمنٹ موومنٹ سے وابستہ عتیق آفریدی کو حال ہی میں خراب تعلیمی ریکارڈ پر کالج سے نکالا گیا تھا۔

میجر (ر) سلیم کا کہنا تھا کہ ٹی ٹی پی سے تعلق کے انکشاف کے بعد عتیق کو انٹیلی جنس ایجنسیوں نے اپنی حراست میں لے لیا، جہاں اس سے تحقیقات جاری ہیں۔

دوسری جانب پرتشدد واقعے میں مبینہ طور پر ملوث ہونے پر معطل کیے جانے والے 29 طالب علم یونیورسٹی ڈسپلنری کمیٹی کے سامنے پیش ہوں گے اور اگر وہ اپنی صفائی پیش کرنے میں ناکام رہے تو ان کا نام یونیورسٹی سے خارج کیا جاسکتا ہے۔

معطل ہونے والے طالب علموں کا تعلق اسلامی جمیعت طلبہ، بلوچ کونسل اور پختون ایجوکیشنل ڈویلپمنٹ موومنٹ سے ہے۔

واضح رہے کہ گزشتہ ماہ پنجاب یونیورسٹی کے طلبہ گروپوں کے درمیان، اونچی آواز میں موسیقی چلانے پر تصادم کے نتیجے میں 15 طالب علم زخمی ہوگئے تھے۔

پرتشدد واقعے میں ملوث ہونے والے طالب علموں کی نشاندہی سی سی ٹی وی فوٹیج سے کی گئی تھی، جبکہ یونیورسٹی انتظامیہ نے ان طالب علموں کے خلاف مقدمہ بھی درج کرایا تھا۔

یہ خبر 14 مارچ 2016 کو ڈان اخبار میں شائع ہوئی۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔