دنیا کے سب سے مہنگے فٹبالر عمرہ کیلئے مکہ میں موجود
مانچسٹر یونائیٹڈ کو فتح دلانے کے بعد فٹبالر پال پوگبا اس وقت عمرہ کی سعادت حاصل کرنے لیے مکہ معظمہ میں موجود ہیں۔
فرانس سے تعلق رکھنے والے بین الاقوامی فٹبالر پال پوگبا اسٹاک ہوم میں اجیکس کے خلاف یورپی ٹائٹل جیتنے کے 3 روز بعد ہی سعودی عرب روانہ ہوئے جہاں انہوں نے رمضان المبارک کے آغاز میں عمرہ کی ادائیگی کا فیصلہ کیا۔
پوگبا نے سماجی رابطے کی ویب سائٹ انسٹا گرام پر اپنی ایک ویڈیو شائع کی جس میں وہ ایک سوٹ کیس گھما رہے ہیں جبکہ ساتھ ہی انھوں نے اپنے مداحوں کا شکریہ ادا کرتے ہوئے لکھا کہ وہ اپنی عبادت کے راستے پر ہیں۔
مزید پڑھیں: دنیا بھر کے کھلاڑیوں نے دی رمضان کی مبارک باد
سماجی رابطے کی ویب سائٹ ٹوئٹر پر پال پوگبا نے اپنی ایک تصویر شائع کی جس میں دیکھا جاسکتا ہے کہ وہ مسجد الحرام میں ہیں اور بیت اللہ ان کے عقب میں واضح نظر آرہا ہے۔
ٹوئٹر پر اپنے ایک پیغام میں پوگبا نے رمضان الکریم کی مبارک باد بھی پیش کی۔
پال پوگبا اس وقت دنیا کے سب سے مہنگے کھلاڑی ہیں جن کی خدمات کو انگلش کاؤنٹی کے فٹبال کلب مانچسٹر یونائیٹڈ نے 114 ملین ڈالر کی ریکارڈ قیمت دے کر خریدا تھا۔
24 سالہ کھلاڑی یورپا لیگ کے فائنل میں مانچسٹر یونائیٹڈ کی نمائندگی کر رہے تھے جس میں انہوں نے ایک اہم گول اسکور کرکے اپنی ٹیم کو فتح سے ہمکنار کیا تھا۔
لائیو ٹی وی