انٹرنیشنل کرکٹ کونسل (آئی سی سی) کو کرکٹ کی ایک ایسی صورتحال کی تصویر موصول ہوئی جس کے بارے میں اسے وضاحت دینی پڑ گئی۔

آئی سی سی کو ایک تصویر بھیجی گئی جس میں دیکھا جاسکتا ہے کہ وکٹ کا درمیان والا اسٹمپ کھلاڑی کے بولڈ ہونے کے بعد زمین سے اکھڑ گیا جبکہ اس پر موجود بیلز اپنی صحیح حالت میں موجود ہیں۔

عام طور پر کرکٹ کی معلومات رکھنے والے افراد یہ جانتے ہیں کہ اگر اسٹمپس پر موجود بیلز گر جائیں تو قانون کے مطابق کھلاڑی آؤٹ ہوجاتا ہے۔

ہم بین الاقوامی کرکٹ میں بھی متعدد مرتبہ یہ دیکھ چکے ہیں کہ وکٹ پر گیند لگنے کے باوجود بیلز اسٹمپس سے نیچے نہیں گرتیں اور اپنی جگہ پر موجود رہتی ہیں جس کی وجہ سے کھلاڑی کو ناٹ آؤٹ ہی قرار دیا جاتا ہے۔

مزید پڑھیں: آئی سی سی کمیٹی نے ٹاس ختم کرنے کی تجویز مسترد کردی

تاہم آئی سی سی نے اپنے ٹوئٹر اکاؤنٹ پر مذکورہ تصویر شیئر کرکے صارفین سے اس کے آؤٹ ہونے یا نہ ہونے کے بارے میں بھی پوچھا۔

ٹوئٹر صارفین کی جانب سے اس پوسٹ پر بڑے دلچسپ تبصرے دیکھنے کو ملے جہاں کسی نے اسے آؤٹ اور کسی نے ناٹ آؤٹ قرار دیا۔

تاہم آئی سی سی نے ہی ایک اور ٹوئٹ کرکے اس کی وضاحت بھی پیش کردی۔

کرکٹ کی عالمی گورننگ باڈی نے کہا کہ ہمیں یہ ٹینس بال کرکٹ کی ایک تصویر موصول ہوئی جس میں پوچھا گیا کہ یہ آؤٹ ہے یا ناٹ آؤٹ ہے؟ جس کے لیے ہم نے اپنے قانون کو کھنگالا۔

آئی سی سی کی جانب سے کہا گیا کہ کرکٹ قانون کی شق 29.1.1 کے تحت مذکورہ صورتحال میں یہ آؤٹ ہے۔

مذکورہ قانون کے مطابق اگر اسٹمپس کے اوپر موجود دونوں بیلز میں سے ایک بھی بیل گر جائے تو بیٹسمین کو آؤٹ قرار دیا جاتا ہے، جبکہ اگر ایک اسٹمپ اکھڑ جائے تو بھی آؤٹ قرار دیا جاتا ہے۔

تصویر کے مطابق بیلز تو نہیں گریں لیکن اسٹمپ زمین سے اکھڑ گیا جس کی وجہ سے بیٹسمین کو آؤٹ قرار دیا گیا۔

ایک فیس بک اکاؤنٹ کی جانب سے کہا گیا کہ یہ تصویر پاکستان کی ہے جہاں بچے ٹینس بال کرکٹ کھیل رہے تھے۔