دنیائے فٹبال کے سب سے بڑے ایوارڈز 68ویں ’بیلون ڈی اور‘ کی تقریب آج شب فرانس کے شہر پیرس میں منعقد ہوئی جہاں سال کے بہترین فٹبالر کا بیلون ڈی اور ہسپانوی اور مانچسٹر سٹی کے کھلاڑی روڈری کو دیا گیا لیکن تقریب سے قبل بدمزگی ہوئی جس پر ریال میڈریڈ نے تقریب کا بائیکاٹ کیا۔

ریال میڈریڈ کے ونگر ونیشیئس جونیئر دوسرے نمبر جبکہ ریال میڈریڈ کے مڈفیلڈر جوڈ بیلنگہم تیسرے نمبر پر رہے، لیکن اپنے کھلاڑیوں کی نامزدگیوں کے باوجود ریال میڈریڈ نے اپنے وفد کو پیرس جاکر فرانس فٹبال کے زیراہتمام ہونے والی ایوارڈ تقریب میں شرکت سے روک دیا۔

28 اکتوبر کی شام سوشل میڈیا پر ذرائع سے یہ خبریں سامنے آئیں کہ ریال میڈریڈ بیلون ڈی اور انتظامیہ کے فیصلے سے سخت مایوس ہوئی ہے کیونکہ ان کے خیال میں ونیشیئس جونیئر کو اس سال بہترین فٹبالر کا اعزاز ملنا چاہیے تھا۔

اس سے قبل 24 گھنٹے پہلے کی جانے والی ووٹنگ میں بھی ونیشیئس جونیئر کا نام سرِفہرست تھا لیکن کچھ گھنٹے پہلے لیک ہونے والی فہرست میں روڈری پہلے نمبر پر موجود تھے۔

حتمی نامزدگیوں میں ریال میڈریڈ کے 6 کھلاڑی جوڈ بیلنگہم، ونیشیئس جونیئر، ڈینی کارویہال، روڈیگر، ٹونی کروس اور کیلن ایمباپے شامل تھے جبکہ بہترین کلب اور منیجر کا ایوارڈ بھی ریال میڈریڈ کو ملنا متوقع تھا۔

فٹبال کے مایہ ناز اور قابلِ اعتبار رپورٹر فیبریزیو رومانو نے پیر کی شام ریال میڈریڈ کی عدم شرکت کی خبر بریک کرتے ہوئے یہ بھی کہا کہ مانچسٹر سٹی نے ریال میڈریڈ کو بتایا کہ وہ پہلے سے جانتے تھے کہ بہترین کھلاڑی کا ایوارڈ روڈری کو دیا جائے گا جس پر ریال میڈریڈ میں یہ تاثر پایا جاتا ہے کہ انہیں اندھیرے میں رکھا گیا۔

یہ پہلا موقع ہے کہ جب فرانس فٹبال کے زیرِاہتمام ہونے والی اس تقریب میں یوئیفا بھی شراکت دار ہے جبکہ ایوارڈز سے قبل کسی بھی کھلاڑی کا فوٹوشوٹ نہیں ہوا جس میں اندازہ ہوجاتا ہے کہ ایوارڈ کس کو ملنے والا ہے۔

ریال میڈریڈ کا کہنا تھا کہ اگر بہترین فٹبالر کا ایوارڈ روڈری کو اس لیے دیا گیا کیونکہ انہوں نے رواں سیزن اسپین اور مانچسٹر سٹی کے ساتھ انگلش پریمیئر لیگ، کلب ورلڈ کپ، یوئیفا سپر کپ اور یورو کپ 2024ء جیتا، تو اس معیار پر ان کے کھلاڑی ڈینی کارویہال بھی پورا اترتے ہیں کیونکہ انہوں نے بھی اسپین اور ریال میڈریڈ کے ساتھ کھیلتے ہوئے یوئیفا چیمپیئنز لیگ، لالیگا، ہسپانوی سپر کپ اور یورو کپ 2024 جیتا ہے۔

ونیشیئس جونیئر کا 2023/2024 سیزن ان کے اب تک کے کریئر کا بہترین سیزن تھا جس میں انہوں نے تمام ٹورنامنٹس میں 26 گولز اسکور کیے جبکہ 12 گول اسسٹ کیے۔ 630 پوائنٹس کے ساتھ وینیشیئس جونیئر یہ ایوارڈ جیت رہے تھے لیکن ان کے مقابلے میں روڈری کو ایوارڈ دے گیا جوکہ 576 پوائنٹس کے ساتھ دوسرے نمبر پر تھے کیونکہ روڈری نے 2023/2024 کے سیزن میں مجموعی طور پر 12 گولز اور 15 اسسٹ کیے۔

ستمبر تک وینی جونیئر کو یقین تھا کہ اس سال کے فاتح وہی ہیں حتیٰ کہ بارسلونا کے خلاف میچ میں حریف کھلاڑیوں انہیں 4 گولز کا طعنہ دے رہے تھے تب بھی وہ کہتے رہے کہ ’میں کل بیلون ڈی اور اٹھاؤں گا‘، ایسے میں انہیں ایوارڈ نہ ملنا ٹیم اور کھلاڑی کے لیے مایوس کُن تھا۔

’بیلون ڈی اور‘ کی تقریب میں دنیائے فٹبال میں نمایاں کارکردگی دکھانے والے مرد اور خواتین کھلاڑیوں کو ایوارڈز دیے جاتے ہیں جن میں یہ اہم اعزازات شامل ہیں۔

کوپا ٹرافی

سال کے بہترین نوجوان کھلاڑی کا کوپا ایوارڈ اسپین اور بارسلونا کے 17 سالہ کھلاڑی لامین یمال کے نام رہا۔ انہوں نے اسپین کے ساتھ یورو کپ 2024ء میں بہترین کارکردگی کا مظاہرہ کیا جہاں فائنل میں اسکور کرکے وہ کسی بھی بڑے بین الاقوامی ٹورنامنٹ کے فائنل میں گول اسکور کرنے والے کم عمر ترین کھلاڑی بنے۔

یاشن ایوارڈ

مسلسل دوسرے سال، بہترین گول کیپر کا اعزاز ارجنٹینا اور ایسٹن ویلا کے ایمی مارٹینز نے اپنے نام کیا۔ سال میں بہترین کارکردگی دکھانے والے گول کیپر کو یاشن ایوارڈ سے نوازا جاتا ہے، وہ یہ ایوارڈ دو بار جیتنے والے پہلے کھلاڑی ہیں۔

گرڈ مولر ایوارڈ

سال کے بہترین اسٹرائیکر کا گرڈ مولر ایوارڈ انگلینڈ اور بائرن میونخ کے فارورڈ ہیری کین اور فرانس اور ریال میڈریڈ کے کیلن ایمباپے کو مشترکہ طور پر دیا گیا۔ دونوں کھلاڑیوں نے گزشتہ سیزن 52، 52 گولز اسکور کیے تھے۔ کیلن ایمباپے کی عدم موجودگی میں صرف ہیری کین نے اپنا ایوارڈ وصول کیا۔

بہترین کلبز

سیزن کے بہترین کلب کا ایوارڈ ریال میڈریڈ کے نام رہا لیکن چونکہ ایوارڈ وصول نہیں کیا گیا اس لیے کوئی تقریر بھی نہیں ہوئی، البتہ خواتین کے بہترین کلب کا ایوارڈ بارسلونا کے حصے میں آیا۔

بہترین منیجر

سال کے بہترین منیجر کا ایوارڈ بھی ریال میڈریڈ کے کوچ کارلو اینچولیٹی کو دیا گیا، ان کی منیجر شپ میں گزشتہ سیزن ریال میڈریڈ نے اسپینش سپر کپ، لالیگا اور چیمپیئنز لیگ ٹرافی جیتی تھی۔

بیلون ڈی اور

سیزن کے بہترین مرد فٹبالر کا ایوارڈ جہاں روڈری کے حصے میں آیا وہیں بہترین خاتون فٹبالر کا ایوارڈ ہسپانوی اور بارسلونا کی کھلاڑی ایتینا بونمتی کے نام رہا جنہوں نے مسلسل دوسرے سال یہ اعزاز حاصل کیا۔

یہ پہلا موقع تھا جب بیلون ڈی اور کے دونوں فاتح کا تعلق ایک ہی ملک یعنی اسپین سے ہے۔

گزشتہ سال فٹبال کی دنیا کے سب سے بڑے انفرادی ایوارڈ بیلون ڈی اور لیونل میسی نے ریکارڈ 8ویں بار جیتا تھا جبکہ 21 سال بعد یہ پہلا موقع تھا کہ جب لیونل میسی اور کرسٹیانو رونالڈو حتمی نامزدگیوں میں اپنی جگہ نہیں بنا پائے۔