اردن: اسرائیلی سفارتخانے کے قریب فائرنگ، 3 پولیس اہلکار زخمی، حملہ آور ہلاک
اردن میں اسرائیلی سفارتخانے کے قریب فائرنگ سے 3 پولیس اہلکار زخمی ہوگئے جب کہ جوابی کارروائی میں حملہ آور ہلاک ہوگیا۔
غیر ملکی خبر رساں ادارے رائٹرز کے مطابق سکیورٹی ذرائع نے واقعے کی تصدیق کرتے ہوئے کہا کہ اسرائیلی سفارتخانے کے قریب فائرنگ کا واقعہ پیش آیا ہے۔
اردن کے سرکاری خبر ایجنسی ’ پیٹرا ’ نے رپورٹ کیا ہے کہ عمان کے قریبی علاقے ربیحا میں گشت پر مامور پولیس اہلکاروں پر فائرنگ کرنے والے مسلح شخص کو پولیس نے جوابی کارروائی میں ہلاک کردیا جب کہ واقعے کی مزید تفتیش جاری ہے۔
عینی شاہدین نے کہا ہے کہ فائرنگ کی آوازیں سنائی دیتے ہی اردن کی پولیس کی بھاری نفری نے اسرائیل کے سفارتخانے کو حفاظتی حصار میں لے لیا تھا۔
دو عینی شاہدین نے بتایا کہ فائرنگ کے بعد پولیس کی گاڑیاں اور ایمبولینسیں اسرائیلی سفارتخانے کی جانب جاتی ہوئی دیکھی گئیں۔
سکیورٹی ذرائع کے مطابق اس واقعے کے بعد علاقہ مکینوں کو گھروں سے باہر نہ نکلنے کی ہدایت کرتے ہوئے کہا گیا کہ شرپسند عناصر کی تلاش کے لیے سرچ آپریشن جاری ہے لہذا عوام گھروں میں ہی موجود رہے۔
لائیو ٹی وی