نو منتخب امریکی صدر ڈونلڈ ٹرمپ کی حلف برداری آج ہوگی، جس کے لیے تمام تیاریاں مکمل ہیں، تاہم واشنگٹن میں شدید سردی کے پیش نظر تقریب کو بلڈنگ کے اندر منتقل کر دیا گیا ہے۔

وائس آف امریکا کی رپورٹ کے مطابق منتخب صدر ڈونلڈ ٹرمپ آج امریکی وقت کے مطابق صبح 11 بج کر 47 منٹ پر حلف اُٹھائیں گے، وہ امریکا کے 47 ویں صدر ہیں، اسی مناسبت سے ان کی حلف برداری کے لیے اس وقت کا انتخاب کیا گیا ہے۔

امریکی صدور کی حلف برداری میں کئی تقریبات اور روایات ہوتی ہیں، اسی مناسبت سے پیر کو بھی حلف برداری کی مرکزی تقریب کے علاوہ واشنگٹن ڈی سی میں کئی ایونٹس ہوں گے۔

نو منتخب صدر دن کا آغاز وائٹ ہاؤس کے قریب واقع سینٹ جونز ایپسکوپل چرچ میں ایک سروس میں شرکت سے کریں گے۔

حلف برداری سے قبل امریکی نو منتخب صدور کی وائٹ ہاؤس کے نزدیک واقع اس چرچ کی سروس میں شرکت بھی ایک روایت ہے۔

جو بائیڈن اپنی اہلیہ کے ہمراہ ڈونلڈ ٹرمپ، اُن کی اہلیہ کا وائٹ ہاؤس میں استقبال کریں گے

وائس آف امریکا نے رپورٹ کیا کہ سروس کے بعد منتخب صدر وائٹ ہاؤس کے قریب واقع صدارتی مہمان خانے بلیئر ہاؤس جائیں گے، بعدازاں، جو بائیڈن اپنی اہلیہ جل بائیڈن کے ہمراہ منتخب صدر ڈونلڈ ٹرمپ اور اُن کی اہلیہ کا وائٹ ہاؤس میں استقبال کریں گے اور چائے پر ملاقات کریں گے، یہ تقریب روایتی طور پر منعقد کی جاتی ہے۔

وائٹ ہاؤس میں چائے کے بعد منتخب صدر ڈونلڈ ٹرمپ کیپٹل ہل کے لیے روانہ ہوں گے، ان کی حلف برداری کی تقریب کیپٹل ہِل کے کینن روٹنڈا ہال میں ہو گی۔

امریکی صدور کی حلف برداری کی تقریب روایتی طور پر کیپٹل بلڈنگ کے باہر ’نیشنل مال‘ پر ہوتی ہے، جس میں لاکھوں لوگ شرکت کرتے ہیں، تاہم سخت سردی کے سبب یہ تقریب بلڈنگ کے اندر منتقل کر دی گئی ہے۔

تقریب میں پہلے نائب صدر جے ڈی وینس عہدے کا حلف اُٹھائیں گے، جس کے بعد ڈونلڈ ٹرمپ امریکا کے 47 ویں صدر کے طور پر عہدے کا حلف لیں گے، وہ اپنا پہلا صدارتی خطاب بھی کریں گے۔

حلف برداری کے دن کی ایک اور روایت صدر کی جانب سے اپنی کابینہ کے وزرا اور دیگر اعلیٰ حکام کی نامزدگیوں اور ایگزیکٹو آرڈرز پر دستخط کرنا ہے۔

اس مقصد کے لیے حلف برداری کی تقریب مکمل ہونے کے بعد امریکی صدر اور نائب صدر کو کیپٹل ہِل کی بلڈنگ میں واقع امریکی صدور کے لیے مخصوص کمرے میں لے جایا جائے گا جہاں ٹرمپ بطور صدر اپنے اولین حکم ناموں پر دستخط کریں گے۔

اس تقریب کے بعد ڈونلڈ ٹرمپ اور نائب صدر کیپٹل ہِل میں اراکینِ کانگریس کی جانب سے دیے گئے ظہرانے میں شریک ہوں گے۔

ظہرانے کے بعد صدر اور نائب صدر فوجی پریڈ کا معائنہ کریں گے، دریں اثنا ٹرمپ اور خاتونِ اول میلانیا ٹرمپ واشنگٹن ڈی سی کے ’کیپٹل ون ارینا‘ جائیں گے، جہاں وہ حلف برداری کی تقریب کے دوسرے حصے یعنی پریڈ میں شرکت کریں گے۔

شام کو ڈونلڈ ٹرمپ وائٹ ہاؤس پہنچیں گے جہاں وہ اوول آفس میں مزید صدارتی حکم ناموں پر دستخط کریں گے۔

پیر کی شب نومنتخب صدر اور خاتونِ اول اپنے اعزاز میں ہونے والی تین مختلف تقریبات میں شریک ہوں گے۔