جنوری 2025 کے دوران ایس ای سی پی میں ریکارڈ 3 ہزار 442 کمپنیوں کی رجسٹریشن
سیکیورٹیز اینڈ ایکسچینج کمیشن آف پاکستان (ایس ای سی پی) نے ایک ماہ میں ریکارڈ تعداد میں کمپنیوں کی رجسٹریشن کرکے ایک تاریخی سنگ میل حاصل کیا ہے، جو گزشتہ سال کی ماہانہ اوسط کے مقابلے میں 39 فیصد اضافے کی عکاسی کرتا ہے۔
ڈان اخبار کی رپورٹ کے مطابق جنوری کے دوران کمیشن نے مختلف شعبوں میں 3 ہزار 442 کمپنیاں رجسٹرڈ کیں، جن میں اہم صنعتوں پر نمایاں توجہ دی گئی۔
انفارمیشن ٹیکنالوجی اورای کامرس کے شعبوں کی کمپنیوں کی رجسٹریشن میں سب سے زیادہ اضافہ دیکھا گیا، جس میں 652 نئی کمپنیاں شامل ہوئیں۔
ہفتے کے روز ایک بیان میں ایس ای سی پی نے کہا کہ یہ ترقی پاکستان میں کاروبار دوست ماحول کو فروغ دینے اور کاروبار کرنے میں آسانی کو فروغ دینے کے لیے اس کے عزم کی عکاسی کرتی ہے۔
اس کے بعد تجارتی شعبے میں 463، سروسز 411، رئیل اسٹیٹ ڈیولپمنٹ اور کنسٹرکشن میں 311 نئی کمپنیاں رجسٹرڈ کی گئیں، سیاحت اور نقل و حمل 242، خوراک اور مشروبات 158، صحت اور فارما 233، ایندھن اور توانائی 81، تعلیم 124، کان کنی اور کھدائی 119، مارکیٹنگ اور اشتہارات 86، ٹیکسٹائل 79، کارپوریٹ زرعی فارمنگ 73 نئی رجسٹریشن کے ساتھ فہرست میں موجود ہیں۔
اس ترقی میں حصہ لینے والے دیگر شعبوں میں آٹو اور الائیڈ، پاور جنریشن، اسپورٹس اینڈ الائیڈ، تمباکو وغیرہ شامل ہیں، جن میں 650 نئی کمپنیاں رجسٹرڈ کی گئیں۔
مزید برآں، انضمام کا رجحان مختلف قسم کے کاروباری ڈھانچوں کے لیے بڑھتی ہوئی ترجیح کا عکاس ہے، نئی رجسٹریشن میں نجی کمپنیوں کا حصہ 58 فیصد، جب کہ سنگل ممبر کمپنیوں کا حصہ 38 فیصد رہا۔
باقی 4 فیصد میں غیر لسٹڈ کمپنیاں، غیر منافع بخش تنظیمیں، تجارتی تنظیمیں اور ایل ایل پیز شامل ہیں۔
ایس ای سی پی کی مسلسل ڈیجیٹل تبدیلی، رجسٹریشن کے عمل کو آسان بنانا اور سہولت فراہم کرنے والا ریگولیٹری فریم ورک اس سنگ میل کو حاصل کرنے میں اہم رہا ہے۔
کمپنیوں کی رجسٹریشن میں اضافہ پاکستان کے بڑھتے ہوئے کاروباری ماحول اور ملک کے ریگولیٹری فریم ورک پر سرمایہ کاروں کے بڑھتے ہوئے اعتماد کا ثبوت ہے۔
لائیو ٹی وی