جوڈیشل کمیشن کا لاہور ہائیکورٹ میں 4 مزید ججز تعینات کرنے کا فیصلہ
جوڈیشل کمیشن آف پاکستان نے لاہور ہائیکورٹ میں چار مزید ججز تعینات کرنے کا فیصلہ کرلیا جب کہ 4 ایڈیشنل جج پنجاب کی ضلعی عدلیہ سے لیے جائیں گے۔
ڈان نیوز کے مطابق جوڈیشل کمیشن آف پاکستان نے تعیناتیوں کے لیے نامزدگیاں 13 فروری تک طلب کرلیں اور اس حوالے سے جوڈیشل کمیشن کی جانب سے ممبران کو آگاہ کردیا گیا ہے۔
جوڈیشل کمیشن کے اعلامیے کے مطابق 6 فروری کے اجلاس میں 4 مزید جج تعینات کرنے کا فیصلہ ہوا ہے۔
چیف جسٹس لاہور ہائی کورٹ کی مشاورت سے چاروں جج ضلعی عدالتوں سے لانے کا فیصلہ ہوا، تمام نامزدگیاں جوڈیشل کمیشن آف پاکستان کی ای میل ایڈریس پر بھیجی جائیں۔
اس سے قبل، 6 فروری کو چیف جسٹس آف پاکستان جسٹس یحییٰ آفریدی کی زیر صدارت جوڈیشل کمیشن کے اجلاس کے دوران لاہور ہائی کورٹ کے لیے 9 ایڈیشنل ججز کے ناموں کی منظوری دی تھی۔
لاہور ہائیکورٹ کے ایڈیشنل ججز کے لیے منظوری پانے والوں میں جسٹس حسن نواز، ملک وقار حیدر اور سردار اکبر علی شامل ہیں۔
اس کے علاوہ ایڈیشنل ججز کے لیے ملک جاوید اقبال، سید احسن رضا، محمد جواد ظفر، خالد اسحٰق، ملک اویس خالد اور چوہدری سلطان کے ناموں کی منظوری بھی دی گئی۔
واضح رہے کہ جوڈیشل کمیشن آف پاکستان کے رکن اور پی ٹی آئی سینیٹر علی ظفر نے چیف جسٹس یحییٰ آفریدی کو خط لکھ کر کل ہونے والا اجلاس ملتوی کرنے کا مطالبہ کیا ہے۔
لائیو ٹی وی