راولپنڈی: تشدد کا نشانہ بننے والی کمسن گھریلو ملازمہ دم توڑ گئی، مالکان میاں بیوی گرفتار
راولپنڈی میں مالکان میاں بیوی کے تشدد کا نشانہ بننے والی کمسن گھریلو ملازمہ اقرا ہولی فیملی اسپتال میں دوران علاج گزشتہ رات دم توڑ گئی۔
ڈان نیوز کے مطابق تھانہ بنی پولیس نے مقتولہ کے والد کی مدعیت میں مقدمہ درج کرکے میاں بیوی کو گرفتار کرلیا،مقدمے میں قتل اور چلڈرن ایکٹ 2004 سمیت سات دفعات شامل کی گئی ہیں۔
مقدمے کے متن کے مطابق اقرا راولپنڈی میں ماہانہ 8 ہزار روپے پر گھریلو ملازمہ تھی، والد 3 ماہ قبل اپنی بیٹی سے مل کر آیا تھا، بیٹی نے باپ کو 12 روز قبل فون پر اطلاع دی تھی کہ گھر کا مالک راشد اور مالکن ثنا تشدد کرتے ہیں۔
پولیس کے مطابق بچی کے ہاتھوں، پیروں اور سر پر تشدد کے نشانات تھے، بچی کے والد نے الزام عائد کیا کہ مالک راشد شفیق اور ثنا نے اس کی بیٹی پر قتل کی نیت سے تشدد کیا۔
پولیس حکام کے مطابق ابتدائی تفتیش میں ملزمان نے جھوٹ بولا کہ بچی کا والد نہیں ہے، تاہم پولیس نے تفتیش کر کے والد کو تلاش کر لیا، واقعے میں ملوث میاں بیوی کو پولیس نے گرفتار کر رکھا ہے۔
لائیو ٹی وی