بُلندترین سطح پر پہنچنے کے بعد سونے کی قیمت میں یکدم کمی
بُلندترین سطح پر پہنچنے کے بعد سونے کی قیمت میں آج یکدم ایک ہزار 600 روپے کی کمی ہو گئی۔
سرکاری خبر رساں ادارے ’اے پی پی‘ کے مطابق آل پاکستان صرافہ جیمز اینڈ جیولرز ایسوسی ایشن نے رپورٹ کیا کہ 24 قیراط کے حامل خالص سونے کی قیمت ایک ہزار 600 روپے تنزلی سے 3 لاکھ ایک ہزار 500 روپے پر آ گئی۔
اسی طرح 24 قیراط 10 گرام سونے کا بھاؤ ایک ہزار 372 روپے نیچے آکر 2 لاکھ 58 ہزار 487 روپے ریکارڈ کیا گیا، جبکہ 22 قیراط 10 گرام سونا 2 لاکھ 36 ہزار 955 روپے میں فروخت ہوا۔
ادھر، چاندی کی فی تولہ اور 10 گرام قیمت بالترتیب 3 ہزار 312 روپے اور 2 ہزار 839 روپے پر برقرار رہی۔
ایسوسی ایشن نے رپورٹ کیا کہ عالمی منڈی میں فی اونس سونے کے دام 16 ڈالر گر کر 2 ہزار 888 ڈالر پر آگئے ہیں۔
واضح رہے کہ 10 فروری کو فی تولہ سونا 4 ہزار روپے کے بڑے اضافے سے نئی بُلند ترین سطح 3 لاکھ 3 ہزار روپے تک جا پہنچا تھا۔
اسی طرح 24 قیراط 10 گرام سونا 3 ہزار 429 روپے بڑھ کر 2 لاکھ 59 ہزار 773 روپے میں فروخت ہوا تھا، جبکہ 22 قیراط 10 گرام سونے کا بھاؤ 2 لاکھ 38 ہزار 133 روپے تک پہنچ گیا تھا۔
لائیو ٹی وی