لاہور: ایئرگن کا چھرا بچے کے سر پر فائر کرنیوالا ملزم گرفتار، اقدام قتل کا مقدمہ درج
لاہور میں ایئر گن کے ساتھ مذاق کرنا شہری کو مہنگا پڑ گیا، والدہ کے ساتھ راستے سے گزرتا ہوا بچہ سر میں چھرا لگنے سے بے ہوش ہوگیا، جسے ہسپتال منتقل کر دیا گیا، تھانہ نشتر کالونی پولیس نے 2 سالہ بچے کے سر میں چھرا مارنے والے ملزم کو گرفتار کرلیا۔
ڈان نیوز کے مطابق ملزم یاسر کو 15 پر کال موصول ہونے پر کارروائی کرتے ہوئے تھانہ نشتر کالونی کی حدود فارسی چوک میں واقع گھر سے گرفتار کیا گیا۔
پولیس حکام کے مطابق والدہ اپنے بچے عیسٰی کو لے کر فارسی چوک کے قریب گلی میں جا رہی تھی، کہ ملزم نے اپنی ایئر گن سے بچے کو ڈرانے کے لیے فائر کیا، گن کا چھرا سر پر لگنے سے بچہ بے ہوش ہو گیا جسے فوری طور پر ہسپتال منتقل کیا گیا۔
پولیس حکام نے بتایا کہ ملزم یاسر سے بندوق برآمد کرلی گئی، ملزم کے خلاف اقدام قتل کا مقدمہ درج کرکے اسے انویسٹی گیشن پولیس کے حوالے کر دیا گیا ہے۔
ایس پی ماڈل ٹاؤن اخلاق اللہ تارڑ نے کہا ہے کہ اسلحہ سے کھیلنا جان لیوا ثابت ہوسکتا ہے، عوام اس طرح کے اقدام سے گریز کریں، ورنہ انہیں قانونی کارروائی کا سامنا کرنا پڑسکتا ہے۔
واضح رہے کہ گزشتہ روز لاہور کے علاقے شاہدرہ میں اسلحہ کے زور پر شہری پر تشددکرکے خود کو ’باپ‘ کہلوانے والے جرائم کے ریکارڈ یافتہ ملزم کو پولیس نے گرفتار کرلیا تھا۔
شاہدرہ کے علاقے کی ایک ویڈیو وائرل ہوئی تھی، جس میں ایک شخص شہری پر تشدد کرکے اسے ہراساں کرنے کے لیے اسلحہ دکھا رہا تھا، اس ویڈیو پر ڈی آئی جی آپریشنز نے نوٹس لیا، جس کے چند گھنٹے بعد ہی شاہدرہ پولیس نے ملزم کو گرفتار کرلیا گیاتھا۔
پولیس ترجمان نے بتایا تھا کہ گرفتار کیے گئے ملزم سے اسلحہ بھی برآمد کرلیا گیا۔
لائیو ٹی وی