عالمی بینک کے ایگزیکٹو ڈائریکٹرز کا وفد پاکستان پہنچ گیا، اعلیٰ حکام سے ملاقاتیں کرے گا
عالمی بینک کا اعلیٰ سطح کا وفد پاکستان پہنچ گیا، ایگزیکٹو ڈائریکٹرز پر مشتمل وفد وزیر اعظم اور وزیر خزانہ سمیت دیگر اعلیٰ حکام سے ملاقاتیں کرے گا۔
ڈان نیوز کے مطابق عالمی بینک کا اعلیٰ سطح کا وفد پاکستان پہنچ گیا ہے جو وزیراعظم، وزیر خزانہ اور اعلیٰ حکام کے علاوہ تاجر رہنماؤں، اساتذہ اور سول سوسائٹی کے نمائندوں کے ساتھ ملاقاتیں کرے گا۔
ذرائع کے مطابق عالمی بینک کا وفد صوبوں کا بھی دورہ کرے گا، عالمی بینک نےگزشتہ ماہ پاکستان کے لیے 10 سالہ کنٹری پارٹنرشپ فریم ورک (سی پی ایف) منظور کیا تھا اور 40 ارب ڈالرز دینے کا وعدہ کیا تھا۔
توسیعی فریم ورک کے تحت 6 کلیدی ترقیاتی شعبوں پر توجہ مرکوز کی جائے گی، سی پی ایف کا مقصد چائلڈ اسٹننگ کو کم کرنا، موسمیاتی تبدیلیوں کی روک تھام ہے۔
عالمی بینک کے مخصوص اہداف میں ٹیکس ریونیو کو جی ڈی پی کے 15 فیصد سے زائد کرنا، قابل تجدید توانائی کی صلاحیت میں 10 گیگاواٹ کا اضافہ، ایک کروڑ 20 لاکھ طلبہ کو معیاری تعلیم کی فراہمی اور 50 کروڑ افراد کو صحت کی سہولتوں کی فراہمی بھی شامل ہے۔
سی پی ایف کے تحت 6 کروڑ افراد کو صاف پانی اور صفائی کی سہولتوں کی فراہمی یقینی بنانا ہوگی، 3 کروڑ افراد کے لیے غذائی تحفظ کو مضبوط بنانا ہوگا جبکہ مانع حمل کی رسائی کو 3 کروڑ خواتین تک بڑھانا ہوگا۔
ذرائع کے مطابق سی پی ایف کے تحٹ سیلاب، دیگر آفات اور خطرات سے نمٹنے کے لیے اہداف بھی مقرر کیے گیے ہیں، کنٹری پارٹنرشپ فریم ورک سے ساڑھے 7 کروڑ افراد مستفید ہوں گے۔
لائیو ٹی وی