چیف جسٹس یحییٰ آفریدی نے کیس مینجمنٹ کمیٹی کی تشکیل نو کردی
چیف جسٹس یحیی آفریدی نے کیس مینجمنٹ کمیٹی کی تشکیل نو کردی،چیف جسٹس یحییٰ آفریدی 6 رکنی کمیٹی کے سربراہ ہوں گے۔
ڈان نیوز کے مطابق چیف جسٹس یحیی آفریدی نے کیس مینجمنٹ کمیٹی کی تشکیل نو کردی،چیف جسٹس 6 رکنی کمیٹی کے سربراہ ہوں گے۔
کمیٹی میں جسٹس نعیم اختر افغان، جسٹس شاہد بلال، جسٹس شفیع صدیقی، ایڈیشنل رجسٹرار سپریم کورٹ اور ڈائریکٹر آئی ٹی سپریم کورٹ شامل ہیں۔
یاد رہے کہ گزشتہ ہفتے سپریم کورٹ میں 7 نئے ججز نے حلف اٹھایا تھا جن کا بینچ بھی تشکیل دے دیا گیا تھا، چیف جسٹس پاکستان کی سربراہی میں 9 رکنی لارجر بینچ نے جمعے کو مختلف مقدمات کی سماعت کی اور ضمانت منسوخی کی 4 درخواستیں مسترد کردیں جبکہ نئے ججز نے 10 مقدمات کی سماعتیں کیں۔
دریں اثنا، سپریم کورٹ میں 7 نئے ججز کے اضافے کے بعد سنیارٹی لسٹ ازسر نو مرتب کر دی گئی تھی، جس میں چیف جسٹس یحییٰ آفریدی کے بعد جسٹس منصور علی شاہ سب سے سینئر جج برقرار ہیں جبکہ جسٹس منیب اختر دوسرے ،جسٹس امین الدین خان تیسرے ، جسٹس جمال مندوخیل چوتھے سینئر ترین جج ہیں۔
اسی طرح سنیارٹی لسٹ میں جسٹس محمد علی مظہر کا پانچویں، جسٹس عائشہ ملک چھٹے، جسٹس اطہر من اللہ ساتویں اور جسٹس حسن اظہر رضوی آٹھویں نمبر پر موجود ہیں۔
نئی سنیارٹی لسٹ کے مطابق جسٹس شاہد وحید نویں، جسٹس مسرت ہلالی دسویں اور جسٹس عرفان سعادت 11 ویں نمبر پر ہیں، جسٹس نعیم اختر افغان سنیارٹی لسٹ میں 12 ویں، جسٹس شہزاد ملک 13 ویں،جسٹس عقیل عباسی اور جسٹس شاہد بلال حسن کا 15 واں نمبر ہے۔
جسٹس ہاشم کاکڑ سنیارٹی میں 16 ویں، جسٹس شفیع صدیقی 17 ویں، جسٹس صلاح الدین پنہور 18ویں، جسٹس شکیل احمد 19 ویں نمبر پر موجود ہیں۔
جسٹس عامر فاروق سنیارٹی میں 20 ویں، جسٹس اشتیاق ابراہیم 21 ویں، جسٹس میاں گل حسن اورنگزیب 22 ویں، جسٹس سردار طارق 23 ویں اور جسٹس مظہر عالم میاں خیل سنیارٹی لسٹ میں 24 ویں نمبر پر ہیں۔
لائیو ٹی وی