پشاور میں مسلح افراد کی کار پر فائرنگ سے شوہر ہلاک، بیوی زخمی ہوگئی
خیبر پختونخوا کے دارالحکومت پشاور میں نا معلوم مسلح افراد کی جانب سے کار پر فائرنگ کے نتیجے میں میاں جاں بحق اور بیوی زخمی ہوگئی۔
ڈان نیوز کے مطابق پشاور میں فائرنگ کا افسوس ناک واقعہ تھانہ شاہ قبول کی حدود باجوڑی گیٹ، لیڈی گرفتھ اسکول کے قریب پیش آیا، گولیاں لگنے سے شوہر موقع پر ہی چل بسا، جب کہ زخمی ہونے والی اس کی اہلیہ کو ہسپتال منتقل کر دیا گیا ہے۔
پولیس حکام کے مطابق واقعے کی اطلاع ملتے ہی نفری جائے وقوعہ پر بھیج دی گئی تھی، ابتدائی اطلاعات کے مطابق گاڑی پر فائرنگ سے جاں بحق ہونے والا شخص اور اس کی اہلیہ کہیں جار ہے تھے، کہ مسلح ملزمان نے ان کی کار پر فائرنگ کر دی، زخمی ہونے والی خاتون مرنے والی کی اہلیہ ہے۔
پولیس حکام نے بتایا کہ ورثا کے آنے اور رپورٹ کرنے پر مقدمہ درج کیا جائے گا، فی الحال پولیس نے خاتون کو علاج کے لیے ہسپتال منتقل کروایا ہے، جاننے کی کوشش کرر ہے ہیں کہ واقعہ کس طرح پیش آیا، اور کون اس میں ملوث ہے، ابھی وثوق سے کچھ نہیں کہا جاسکتا کہ فائرنگ کا واقعہ دشمنی ہے یا کوئی اور وجہ ہے؟۔
واضح رہے کہ 2 روز قبل بھی پشاور کے علاقے بڈھ بیر میں گاڑی پر فائرنگ سے 5 افراد جاں بحق ہوگئے تھے۔
پولیس حکام نے بتایا تھا کہ فائرنگ کی وجہ ذاتی دشمنی ہے، ملزمان نے گاڑی پر اندھا دھند فائرنگ کی، ملزمان کی تلاش شروع کردی گئی تھی۔
پولیس حکام کے مطابق فائرنگ کا واقعہ رات 2 بجے پیش آیا تھا، فائرنگ کی اطلاع ملنے کے بعد بھاری نفری جائے وقوعہ پر پہنچی، اور لاشوں کو ہسپتال منتقل کر دیا گیا تھا۔
ابتدائی معلومات کے مطابق مسلح ملزمان نے گاڑی پر اندھا دھند فائرنگ کی، واقعہ ذاتی دشمنی کا شاخسانہ دکھائی دیتا تھا۔
یاد رہے کہ خیبر پختونخوا میں قبائلی اضلاع سے تعلق رکھنے والے افراد میں ذاتی دشمنیوں کا سلسلہ عام ہے، فریقین ایک دوسرے پر فائرنگ کرتے ہیں، جس کے نتیجے میں ہلاکتیں رپورٹ ہوتی رہتی ہیں، ان واقعات میں شہری زخمی بھی ہوتے ہیں۔
لائیو ٹی وی