ٹرمپ اور پوپ فرانسس سمیت 300 سے زائد افراد ’نوبیل امن انعام‘ کیلئے نامزد
اس سال کے ’نوبیل امن انعام‘ کے لیے امریکی صدر ٹرمپ اور پوپ فرانسس سمیت 300 سے زائد افراد کو نامزد کیا گیا ہے۔
ڈان اخبار میں شائع فرانسیسی خبر رساں ادارے ’اے ایف پی‘ کی رپورٹ میں کہا گیا ہے کہ نوبیل قوانین کے مطابق امیدواروں کی شناخت 50 سال تک خفیہ رکھی جاتی ہے، رواں سال ان 2 بڑے ناموں کے ساتھ ساتھ نیٹو کے سابق سربراہ جینز اسٹولٹن برگ کا نام بھی لیا جارہا تھا۔
ناروے کے نوبیل انسٹی ٹیوٹ نے ایک بیان میں کہا کہ مجموعی طور پر 338 نامزدگیوں میں 244 افراد اور 94 تنظیمیں شامل ہیں، یہ نامزدگیاں پچھلے سال کی 286 نامزدگیوں کے مقابلے میں نمایاں طور پر زیادہ ہیں، لیکن 2016 میں رجسٹرڈ ریکارڈ 376 نامزدگیوں سے کم ہیں۔
انعامی کمیٹی نامزد افراد کے بارے میں ہمیشہ خاموش رہتی ہے، لیکن نامزد کرنے کے اہل افراد (جن میں دنیا کے کسی بھی ملک کے سابق انعام یافتہ، قانون ساز اور کابینہ کے وزرا اور کچھ یونیورسٹی کے پروفیسر شامل ہیں) اس شخص یا تنظیم کا نام ظاہر کرنے کے لیے آزاد ہیں، جس کی انہوں نے تجویز پیش کی ہے۔
پیر کے روز امریکی کانگریس کے رکن ڈیرل عیسیٰ نے ’ایکس‘ پر ایک پوسٹ میں اعلان کیا کہ وہ بھی اس باوقار انعام کے لیے ٹرمپ کو نامزد کریں گے، بعد ازاں امریکی میڈیا نے ڈیرل عیسیٰ کے دفتر کا حوالہ دیتے ہوئے کہا کہ یہ نامزدگی مشرق وسطیٰ میں ٹرمپ کی کوششوں سے متاثر ہے۔
یوکرین کے ذرائع ابلاغ کے مطابق ڈیرل عیسیٰ کی نامزدگی ’ڈیڈ لائن کے بعد‘ جمع کرائی جائے گی، لیکن یوکرین کے رکن پارلیمنٹ اولیکسنڈر میرزکو نے بھی نومبر میں ٹرمپ کو دوبارہ نامزد کیا تھا تاکہ اس وقت کے نومنتخب صدر کی توجہ اپنی جانب مبذول کرائی جا سکے۔
ٹرمپ کو گزشتہ برسوں میں بھی امیدوار کے طور پر پیش کیا گیا تھا، لیکن اس سال نامزدگی خاص طور پر توجہ مبذول کرنے والی ہوگی۔
امریکی صدر نے یوکرین میں جنگ کے بارے میں ماسکو کے ساتھ بات چیت کا آغاز کرکے تنازعات کو جنم دیا، اور امریکی خارجہ پالیسی میں تبدیلیوں کے ساتھ یورپی اتحادیوں کو پریشان کیا ہے۔
جنوری میں ہزاروں افراد نے برطانیہ میں ایک پٹیشن پر دستخط کیے تھے، جس میں فرانسیسی خاتون گیسلے پیلیکوٹ کو امن کا نوبیل انعام دینے کا مطالبہ کیا گیا تھا۔
اس خاتون نے اپنے سابق شوہر کے خلاف مقدمے کی سماعت کے دوران اپنے کھلے، عوامی موقف کے لیے تعریف حاصل کی تھی، اس کے شوہر کو اجنبی افراد سے اپنی اہلیہ کا ریپ کروانے کے جرم میں سزا دی گئی تھی۔
لائیو ٹی وی