ای سی سی اجلاس: میڈیا کو واجبات ادا کرنے کیلئے وزارت اطلاعات کو 2 ارب روپے دینے کی منظوری
کابینہ کی اقتصادی رابطہ کمیٹی ( ای سی سی ) نے وزارت اطلاعات کے لیے دو ارب روپے کی منظوری دے دی۔
فنانس ڈویژن کی جانب سے جاری بیان کے مطابق میڈیا ہاؤسز کے اشتہارات کی مد میں واجبات کی ادائیگی کے لیے وزارت اطلاعات کو یہ رقم دینے کی منظور دی گئی ہے۔
واضح رہے کہ رواں ماہ کے اوائل میں لاہور ہائی کورٹ نے سپریم کورٹ کے احکامات کے باوجود سرکاری اشتہاری پالیسی وضع نہ کیے جانے پر وفاق اور حکومت پنجاب سے جواب طلب کرلیا تھا۔
جسٹس فاروق حیدر نے ذرائع ابلاغ میں وزیراعظم شہباز شریف اور وزیراعلیٰ پنجاب مریم نواز کی تصاویر پر مشتمل اشتہارات شائع اور نشر ہونے کے خلاف پاکستان تحریک انصاف پنجاب کی چیف آرگنائزر عالیہ حمزہ ملک کی ایڈوکیٹ اظہر صدیق کے توسط سے دائر کی گئی پٹیشن کی سماعت کرتے ہوئے وفاقی اور حکومت پنجاب کو جواب داخل کرنے ہدایت کی تھی۔
آج وفاقی وزیرخزانہ محمد اورنگزیب کے زیرصدارت ہونے والے ای سی سی کے اجلاس میں یہ فیصلہ کیا گیا۔
فنانس ڈویژن کی جانب سے جاری بیان میں کہا گیا ہے کہ’ ای سی سی نے غور و خوض کے بعد وزارت اطلاعات و نشریات کی سمری کی منظوری دی جس میں مذکورہ وزارت کے تفویض کردہ 5 ارب 60 کروڑ روپے کے بجٹ میں سے 2 ارب کی تیکنیکی ضمنی گرانٹ ( ٹی ایس جی ) دینے کی استدعا کی گئی تھی۔ ’
بیان میں مزید کہا گیا کہ منظور شدہ گرانٹ میڈیا ہاؤسز کے اشتہارات کی مد میں واجبات کی ادائیگیوں کے لیے استعمال کی جائے گی۔
اجلاس میں وزیر توانائی ( پاور ڈویژن ) سردار اویس احمد خان لغاری، وزیرپٹرولیم علی پرویز ملک، وزیر برائے سرمایہ کاری بورڈ قیصر احمد شیخ، اور چیئرمین سیکیورٹیز اینڈ ایکسچینج کمیشن آف پاکستان ( ایس ای سی پی )، اور متعلقہ وزارتوں اور ڈویژنوں کے وفاقی سیکریٹریوں اور اعلیٰ حکام نے شرکت کی۔
فنانس ڈویژن کی جانب سے جاری بیان کے مطابق ای سی سی نے رواں مالی سال کے دوران صوبہ پنجاب میں سسٹین ایبل ڈیولپمنٹ گولز اچیومنٹ پروگرام ( ایس اے اپی) اسکیموں پر عمل درآمد کے لیے وزارت دفاع کو 43 کروڑ روپے کی تیکنیکی ضمنی گرانٹ کی بھی منظوری دی۔
ای سی سی نے جناح میڈیکل کمپلیکس اینڈ ریسرچ سینٹر کمپنی کے لیے مختص 25 کروڑ روپے کی بھی منظوری دے دی۔
فنانس ڈویژن کے مطابق اس رقم سے اسلام آباد میں 1000 بستروں کا جدید اکیڈیمک میڈیکل سینٹر تعمیر کیا جائے گا۔ تاہم ای سی سی نے جناح میڈیکل کمپلیکس اینڈ ریسرچ سینٹر کمپنی کو مزید رقم طلب کرنے سے قبل منظور شدہ 25 کروڑ روپے کے اخراجات اور سرگرمیوں کی تفصیلات فراہم کرنے کی ہدایت کی ہے۔
دوران اجلاس ای سی سی نے اسٹیٹ بینک کی ایگزم بینک کو دی گئی طویل مدتی مالیاتی سہولت ( ایل ٹی ایف ایف) کے بتدریج خاتمے سے متعلق فنانس ڈویژن کی پیش کردہ سمری پر بھی بحث کی۔
بیان میں مزید بتایا گیا کہ ای سی سی نے اسٹیٹ بینک کے ایل ٹی ایف ایف کے 330 ارب روپے کے پورٹ فولیو کو ایگزم بینک کو بتدریج منتقل کرنے کا فیصلہ کیا، جبکہ رواں مالی سال کے نئے پورٹ فولیو کی ایل ٹی ایف ایف کی سبسڈی کی ضروریات کو پورا کرنے کے لیے ایک ارب روپے کی تکنیکی ضمنی گرانٹ بھی مختص کردی گئی۔
گزشتہ ماہ ہونے والے اجلاس میں ای سی سی نے برکس ( ) ممالک کے قائم کردہ نیو ڈیولپمنٹ بینک ( این ڈی بی ) کے لیے پاکستانی کی رکنیت کی منظوری دیتے ہوئے تمام بجلی کی تقسیم کار کمپنیوں کے حصص صدر پاکستان کو منتقل کرنے کا حکم دیا تھا جو تین عشروں سے قرض دینے والے اداروں کی اہم شرط تھی۔
لائیو ٹی وی