آذربائیجان کے صدر کا وزیراعظم کو خط، یوم پاکستان پر مبارک باد
آذربائیجان کے صدر الہام علیوف نے یوم پاکستان پر وزیراعظم شہباز شریف اور پاکستانی قوم کو خط لکھ کر مبارک باد دی ہے۔
ڈان نیوز کے مطابق تہنیتی خط میں آذربائیجان کے صدر کا کہنا تھا کہ وہ آذر بائیجان کے عوام اور اپنی جانب سے آپ کو اور پاکستان کے عوام کو پاکستان کے قومی دن کے موقع پر دل کی اتھاہ گہرائیوں سے مبارکباد پیش کرتے ہیں۔
انہوں نے دونوں ملکوں کے درمیان تذویراتی شراکت داری اور باہمی تعاون کی موجودہ سطح پر اطمینان کا اظہار کرتے ہوئے انہیں مزید وسعت دینے کے عزم کا اظہار کیا۔
ان کا کہنا تھا کہ معیشت، ٹرانسپورٹ، لاجسٹک، توانائی، سرمایہ کاری، دفاعی صنعت اور باہمی دلچسپی کے مختلف شعبہ جات میں ہماری کامیاب مشترکہ کاوشیں تعلقات کیلئے کلیدی اہمیت رکھتی ہیں۔
آذربائیجان کے صدر نے کہا کہ عالمی امور پر ہمارا موقف اور باہمی تعاون دونوں ملکوں کے درمیان بھائی چارے کا اظہار ہے جو ہمارے دونوں ملکوں اور عوام کے بنیادی مفاد میں کردار ادا کر رہا ہے۔
ان کا کہنا تھا کہ دونوں ملکوں کے تعلقات جامع ترقی سے جڑے ہیں جن کی بنیادیں باہمی ثقافتی اقدار اوریکجہتی سے مزین اور احترام اور اعتماد پر محیط ہیں۔ اعلیٰ سطح کے دورے، ملاقاتیں اور رابطے ہمارے تعلقات میں نمایاں بڑھوتری کا واضح اشارہ ہے۔
الہام علیوف نے کہا کہ وہ باہمی اعتماد، مفاہمت اور اخلاص پر مبنی سودمند ملاقاتوں کو سراہتے ہیں جو گزشتہ ماہ آذر بائیجان کے سرکاری دورہ کے موقع پر ہوئیں اور جن پر ہم نے تبادلہ خیال کیا جب کہ اس دوران ہونے والے معاہدے دونوں ممالک کے تعلقات کی سمت کا تعین کریں گے۔
ان کا مزید کہنا تھا کہ انشا اللہ ہم اپنے تعلقات کو مزید وسعت دیں گے۔ انہوں نے روایتی دوستی اور تذویراتی شراکت داری پر اطمینان کا اظہار کرتے ہوئے کہا کہ اس سے آزمودہ بھائی چارہ پر تعلقات اور ہمارے عوام کا اتحاد مزید مستحکم ہوگا۔
انہوں نے وزیراعظم شہباز شریف کے لیے اچھی صحت، خوشی اور کامیابیوں کی دعا کرتے ہوئے پاکستان کے برادر عوام کیلئے امن ، خوشحالی اور بہتری کیلئے دعا کی۔
لائیو ٹی وی