لاہور: توہین رسالت کیس میں مجرم محمد نذیر کو سزائے موت، ایک لاکھ روپے جرمانہ
لاہور کی سیشن کورٹ نے توہین رسالت کیس میں مجرم محمد نذیر کو سزائے موت اور ایک لاکھ روپے جرمانے کا حکم دے دیا۔
ڈان نیوز کے مطابق ایڈیشنل سیشن جج نے ثبوت اور گواہوں کے بیانات کے بعد فیصلہ سنایا۔
عدالت کا فیصلے میں کہنا تھا کہ پراسیکیوشن نے بغیر کسی شکوک و شبہات کے اپناکیس ثابت کیا ہے، لہٰذا مجرم کو سزائے موت کا حکم سنایا جاتا ہے، اس کے علاوہ مجرم کو ایک لاکھ روپے جرمانہ کی سزا بھی سنائی جاتی ہے۔
واضح رہے مجرم کے خلاف تھانہ سندر پولیس نے 2014 میں مقدمہ درج کیا تھا، مجرم کے خلاف ایس ایم ایس کے ذریعے توہینِ رسالت کا مقدمہ درج کیا گیا تھا۔
یاد رہے کہ گزشتہ روز (25 مارچ) راولپنڈی کی مقامی عدالت نے 5 افراد کو توہین رسالت اور پیکا قوانین کے تحت موت اور عمر قید کی سزائیں سنائی تھیں۔
ڈان نیوز کے مطابق راولپنڈی کے ایڈیشنل سیشن جج محمد طارق ایوب نے 5 ملزمان کو توہین رسالت کے مقدمہ میں سزائے موت، عمر قید اور مجموعی طور پر 100 سال قید کی سزا سنا دی تھی۔
ملزمان کو دفعہ 295 سی میں سزائے موت، 295 بی میں عمر قید، 295 اے میں 10 سال قید، ایک لاکھ روپے جرمانہ کی سزائیں سنائی گئی تھیں۔
لائیو ٹی وی