نیدرلینڈز: ایمسٹرڈیم میں چاقو سے حملہ، 2 امریکیوں سمیت 5 افراد زخمی
نیدرلینڈز کے دارالحکومت ایمسٹرڈیم کے قلب میں ایک شخص نے چاقو کے حملے میں دو امریکی شہریوں سمیت 5 افراد کو زخمی کردیا جن میں سے 2 کی حالت تشویشناک ہے۔
خبر رساں ایجنسی ’اے ایف پی‘ کی رپورٹ کے مطابق پولیس نے اس سے قبل چار شدید زخمیوں کی تعداد بتائی تھی، لیکن ایسا لگتا ہے کہ الجھن اس حقیقت کے نتیجے میں پیدا ہوئی کہ ملزم خود بھی زخمی ہوا تھا۔
ایمسٹرڈیم پولیس نے ’ایکس‘ پر بیان میں کہا کہ ’اپ ڈیٹ: آج دوپہر کو چاقو سے حملے کے واقعے میں چار نہیں بلکہ پانچ افراد زخمی ہوئے تھے۔ اس کے علاوہ، مشتبہ شخص خود بھی زخمی ہوا ہے۔‘
پولیس نے ڈیم سینٹرل اسکوائر کے قریب چاقو کے حملے کے محرک کے بارے میں کچھ بتانے سے انکار کرتے ہوئے کہا کہ ان کی تحقیقات جاری ہیں۔
ان کا کہنا تھا کہ وہ اس امکان پر غور کر رہے ہیں کہ مشتبہ شخص نے بےترتیب طور پر متاثرین کو نشانہ بنایا ہو، لیکن اصل مقصد اب تک نامعلوم ہے۔’
حکام نے بتایا کہ ’مشتبہ شخص کو ایک شہری کی مدد سے قابو کیا گیا۔ اس کی ٹانگ پر چوٹ لگنے کی وجہ سے اسے ہسپتال لے جایا گیا ہے۔‘
پولیس کے ترجمان نے پہلے صحافیوں کو بتایا تھا کہ مشتبہ شخص کو طبی امداد دی جا رہی ہے اور اس سے بعد میں پوچھ گچھ کی جائے گی۔
حکام نے زخمیوں کی مدد کے لیے ایک ٹراما ہیلی کاپٹر ڈیم سینٹرل اسکوائر پر بھیجا تھا۔ پولیس نے بتایا کہ دو شدید زخمی اس وقت ہسپتال میں زیر علاج ہیں۔
پولیس ترجمان زخمیوں کی حالت کے بارے میں معلومات دینے سے قاصر رہے۔
حکام نے بتایا کہ متاثرین میں ایک 67 سالہ خاتون اور ایک 69 سالہ مرد شامل ہیں جن کا تعلق امریکا سے ہے، پولینڈ کا ایک 26 سالہ مرد، بیلجیئم کی 73 سالہ خاتون اور ایمسٹرڈیم کی ایک 19 سالہ خاتون شامل ہیں۔
جائے وقوع پر موجود ’اے ایف پی‘ کے رپورٹر نے بتایا کہ زخمیوں کو جائے وقوع سے نکال لیا گیا ہے لیکن پولیس کی بھاری نفری اور ایمبولینسز اب بھی موجود ہیں۔
لائیو ٹی وی