کراچی: گاڑی کی ٹکر سے میاں، بیوی کی ہلاکت کے کیس میں ملزم انیق کو جیل بھیج دیا گیا
کراچی میں جوڈیشل مجسٹریٹ شرقی کی عدالت نے شاہراہِ فیصل پرگاڑی کی ٹکر سے میاں بیوی کی ہلاکت کے کیس میں ملزم انیق کو عدالتی ریمانڈ پر جیل بھیجتے ہوئے آئندہ سماعت پر عمر کے تعین سے متعلق رپورٹ اور چالان طلب کرلیا۔
ڈان نیوز کے مطابق کراچی میں جوڈیشل مجسٹریٹ شرقی کی عدالت میں شاہراہِ فیصل پرگاڑی کی ٹکر سے میاں بیوی کی ہلاکت کے کیس کی سماعت ہوئی، گرفتار ملزم انیق کو عدالت میں پیش کیا گیا۔
عدالت نے تفتیشی افسر سے سوال کیا کہ کتنے دن کا ریمانڈ ملا تھا؟ تفتیشی افسر نے عدالت کو بتایا کہ 8 دن کا ریمانڈ ملا تھا۔
عدالت نے سوال کیا کہ ملزم کی عمر کے تعین کا حکم دیا تھا، رپورٹ کہاں ہے؟ تفتیشی افسر نے بتایا کہ جس دن ریمانڈ ملا تھا، اسی دن ملزم کو عمر کے تعین کے لیے ہسپتال لے کر گیا تھا۔
انہوں نے بتایا کہ پولیس سرجن نے 4 دن میں رپورٹ دینے کا کہا تھا لیکن عید کی چھٹیوں کی وجہ سے رپورٹ نہیں ملی۔
عدالت نے سوال کیا کہ ابتدائی رپورٹ تو ملی ہوگا نا؟ تفتیشی افسر نے بتایا کہ نہیں ابتدائی رپورٹ بھی نہیں ملی۔
دوران سماعت مدعی مقدمہ اور ملزم کے وکلا کے درمیان تلخ کلامی بھی ہوئی، تفتیشی افسر نے بتایا کہ گاڑی کا مالک تاحال گرفتار نہیں ہوا، ملزم کے گھر پر تالا لگا ہوا ہے۔
لائیو ٹی وی