پی ٹی آئی 8 حصوں میں تقسیم ہوچکی، عمران خان کا کنٹرول بھی نہ رہا، اختیار علی
وزیراعظم شہباز شریف کے کوآرڈینیٹر اور مسلم لیگ (ن) کے رہنما اختیار ولی خان نے دعویٰ کیا ہے کہ پاکستان تحریک انصاف (پی ٹی آئی) 8 حصوں میں تقسیم ہوچکی ہے جب کہ عمران خان بھی پارٹی پر کنٹرول کھو چکے ہیں۔
ڈان نیوز کے مطابق مسلم لیگ (ن) کے رہنما اختیار ولی خان نے وزیراعلیٰ خیبرپختونخوا کے بیان پر ردعمل دیتے ہوئے کہا کہ علی امین گنڈاپور حکومت نے کرپشن کے سابقہ ریکارڈ بھی توڑ دیے ہیں۔
ان کا کہنا تھا کہ علی امین گنڈاپور اب خود بتائیں کہ اس کرپشن پر اینٹ اب انہیں ماری جائے یا بانی پی ٹی آئی کو ماری جائے، انہوں نے تحریک انصاف کی حکومتوں کو پاکستان کی تاریخ کی کرپٹ ترین حکومتیں قرار دے دیا۔
اختیار ولی نے کہا کہ پی ٹی آئی سابق آرمی چیف جنرل (ریٹائرڈ) باجوہ اور بیک ڈور سازشوں کے ذریعے حکومت میں آئی تھی جب کہ بانی پی ٹی آئی آج بھی کسی چور دروازے کی تلاش میں اسٹیبلشمنٹ سے بات کرنے کے لیے منتیں کررہا ہے۔
ان کا کہنا تھا کہ فوج کرپشن میں لتھڑی تحریک انصاف قیادت کے ساتھ بیٹھ کر اپنا دامن داغدار نہیں کرے گی، پی ٹی آئی 8 حصوں میں تقسیم ہوچکی ہے اور عمران خان بھی کنٹرول کھو چکے ہیں۔
وزیراعظم کے کوآرڈینیٹر نے کہا کہ بجلی کی قیمتوں میں کمی سے پورا پاکستان خوش ہے لیکن پی ٹی آئی والوں کو دورے پڑ رہے ہیں۔
ان کا مزید کہنا تھا کہ وزیراعظم شہباز شریف کی قیادت میں ملک کی ترقی کی سمت درست سمت میں بڑھنا شروع ہو چکی ہے، دعویٰ کیا کہ اب وزیراعظم شہباز شریف ہر ماہ قوم کو ایک سے بڑھکر ایک نئی خوشخبری دیا کریں گے۔
لائیو ٹی وی