• KHI: Zuhr 12:29pm Asr 5:06pm
  • LHR: Zuhr 12:00pm Asr 4:45pm
  • ISB: Zuhr 12:05pm Asr 4:53pm
  • KHI: Zuhr 12:29pm Asr 5:06pm
  • LHR: Zuhr 12:00pm Asr 4:45pm
  • ISB: Zuhr 12:05pm Asr 4:53pm

مجرمانہ سرگرمیوں پر ڈی پورٹ پاکستانیوں کے پاسپورٹ بلاک کیے جائیں گے، وزیر داخلہ

شائع April 11, 2025
وزیرداخلہ محسن نقوی نے مشین ریڈیبل پاسپورٹ پرنٹ کرنے کے لیے نصب کی گئی نئی مشینوں کا بھی معائنہ کیا — فوٹو: پی پی آئی
وزیرداخلہ محسن نقوی نے مشین ریڈیبل پاسپورٹ پرنٹ کرنے کے لیے نصب کی گئی نئی مشینوں کا بھی معائنہ کیا — فوٹو: پی پی آئی

وفاقی وزیر داخلہ محسن نقوی نے اعلان کیا ہے کہ حکومت مجرمانہ سرگرمیوں کی وجہ سے دوسرے ممالک سے ڈی پورٹ کیے گئے پاکستانیوں کے پاسپورٹ بلاک کرے گی اور نئی سفری دستاویزات کے اجرا کا عمل سخت کرے گی۔

ڈان اخبار میں شائع رپورٹ کے مطابق اس اقدام کا مقصد بیرون ملک جاکر بھیک مانگنے جیسے غیر قانونی کام کرنے والے پاکستانی شہریوں کو روکنا ہے۔

حالیہ برسوں میں سیکڑوں پاکستانیوں کو بھیک مانگنے کے الزام میں ملک بدر کیا جا چکا ہے جن میں سے زیادہ تر کو خلیجی ممالک سے بھیجا گیا ہے۔

وفاقی وزیر نے حکام کو ہدایت کی کہ پاسپورٹ کے حصول کے لیے نئی شرائط کے حوالے سے تمام قانونی کارروائیاں مکمل کی جائیں۔

نئی شرائط سے غیر قانونی امیگریشن کو روکنے اور غیر قانونی کام کرنے والوں کی اسکریننگ میں مدد ملے گی۔

انہوں نے یہ ہدایات ڈائریکٹوریٹ جنرل آف امیگریشن اینڈ پاسپورٹس میں ایک اجلاس کے دوران جاری کیں۔

اجلاس میں وزیر مملکت برائے داخلہ طلال چوہدری، سیکریٹری داخلہ خرم آغا، ڈی جی ایف آئی اے رفعت مختار راجا اور ڈی جی پاسپورٹ مصطفیٰ جمال قاضی نے بھی شرکت کی۔

طلال چوہدری کا کہنا تھا کہ اس فیصلے سے عالمی برادری کو غیر قانونی تارکین وطن کے خلاف کارروائی کے پاکستان کے عزم کے حوالے سے مثبت پیغام جائے گا۔

محسن نقوی نے کہا کہ ملک بدر کیے گئے افراد کے پاسپورٹ بلاک کرنے کی ہدایت پر مکمل عمل درآمد کیا جائے۔

انہوں نے مشین ریڈیبل پاسپورٹ پرنٹ کرنے اور ای پاسپورٹ تیار کرنے کے لیے نصب کی گئی نئی مشینوں کا بھی معائنہ کیا۔

وفاقی وزیر نے ان جرمن ماہرین سے بھی ملاقات کی جو مشینوں کی تنصیب کے لیے پاکستان میں موجود ہیں۔

محسن نقوی نے کہا کہ نئی مشینوں سے پاسپورٹ آفس کی چھپائی کی صلاحیت میں اضافہ ہوگا اور پاسپورٹ کے اجرا میں تیزی آئے گی۔

ڈی جی پاسپورٹ مصطفیٰ جمال قاضی نے وفاقی وزیر کو بریفنگ دیتے ہوئے بتایا کہ شہریوں کی سہولت کے لیے جلد موبائل ایپ لانچ کی جائے گی۔

کارٹون

کارٹون : 1 مئی 2025
کارٹون : 30 اپریل 2025