ہندوستان کا امریکی وفد کو ویزے سے انکار کا دفاع
واشنگٹن: ہندوستانی حکام نے امریکی وفد کو ویزا جاری کرنے سے انکار کے فیصلے کو درست قرار دیتے ہوئے کہا ہے کہ وہ اپنے ملک میں مذہبی آزادی کے حوالے سے کسی غیر ملکی تنظیم کے فیصلے کی ضرورت محسوس نہیں کرتے۔
واضح رہے کہ 3 روز قبل امریکی کمیشن برائے بین الاقوامی مذہبی آزادی (یو ایس سی آئی آر ایف) نے کہا تھا کہ ہندوستان نے اس کے 'فیکٹ فائیڈنگ مشن' کو ویزا جاری کرنے سے انکار کردیا ہے۔
امریکی وفد کو ہندوستان میں مذہبی اقلیتوں سے امتیازی سلوک کی رپورٹس کی تحقیقات کے لیے ہندوستان جانا تھا۔
مزید پڑھیں : ہندوستان کا امریکی وفد کو ویزا جاری کرنے سے انکار
واشنگٹن میں ہندوستانی سفارت خانے کی جانب سے جاری بیان میں کہا گیا کہ ہمیں دکھ ہے کہ کمیشن کے وفد کو ویزا جاری کرنے سے انکار کیا گیا، لیکن اس حوالے سے فیصلے پر نظر ثانی کی ضرورت نہیں ہے۔
بیان کے مطابق اس طرح کے دوروں کے لیے ہندوستان کی ویزا پالیسی میں کوئی تبدیلی نہیں آئی ہے، ہندوستان ایک متحرک معاشرہ ہے جس کا آئین شہریوں کو مذہبی آزادی سمیت تمام بنیادی حقوق کی ضمانت دیتا ہے۔
سفارت خانے کے بیان میں کہا گیا کہ ہم یو ایس سی آئی آر ایف سمیت کسی غیر ملکی تنظیم کے اپنے ملک میں مذہبی آزادی کے حوالے سے فیصلے کی ضرورت محسوس نہیں کرتے اور نہ ہندوستانی شہریوں کے آئینی طور پر محفوظ حقوق پر کوئی تبصرہ چاہتے ہیں۔
خیال رہے کہ ہندوستان کے حوالے سے امریکی کمیشن نے اپنی حالیہ رپورٹ میں نشاندہی کی تھی کہ ہندوستان میں مذہبی اقلیتوں کے تحفظ اور انہیں انصاف فراہم کرنے کے لیے مزید جدو جہد کی ضرورت ہے۔
کمیشن کی رپورٹ میں یہ بھی کہا گیا تھا کہ ہندوستان کی موجودہ حکومت کے اقتدار میں آنے کے بعد اقلیتوں کو نشانہ بنانے اور فرقہ وارانہ تشدد میں اضافہ ہوا ہے۔
یہ خبر 7 مارچ 2016 کو ڈان اخبار میں شائع ہوئی۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔
لائیو ٹی وی