بھارت کی راہداری میں شمولیت مسئلہ کشمیر کے حل سے مشروط
اسلام آباد: کشمیر امور اور گلگت بلتستان کے وفاقی وزیر محمد برجیس طاہر نے بھارت کی پاک چین اقتصادی راہداری منصوبے میں شمولیت کو مسئلہ کشمیر کے حل سے مشروط کردیا ہے۔
یوم یکجہتی کشمیر کے حوالے سے منعقدہ ایک پریس کانفرنس میں وفاقی وزیر کا کہنا تھا کہ 'اگر راہداری منصوبے کا حصہ بننے کی خواہش ہے تو بھارت کو مسئلہ کشمیر اقوام متحدہ کی منظور کردہ قرار دادوں کی روشنی میں حل کرنا چاہیے'۔
انھوں نے کہا کہ پاکستان مذاکرات کے ذریعے بھارت کے ساتھ تمام تصفیہ طلب معاملات کو حل کرنے کا خواہاں ہے، جس میں کشمیر بھی شامل ہے، تاہم نئی دہلی اصل حقائق کو چھپانے کیلئے کشمیر میں طاقت کا بے دریغ استمعال کررہا ہے۔
وفاقی وزیر نے کہا کہ بھارت کشمیریوں کے حق آزادی کی تحریک کو طاقت سے دبانے میں ناکام ہوگیا ہے۔
ان کا کہنا تھا کہ 'پاکستان نے ہمیشہ کشمیریوں کے جائز موقف اور ان کے حق خود ارادیت کی حمایت کی ہے اور ایسا کرتا رہے گا'۔
انھوں نے کہا کہ 'ہم کشمیریوں کی ہر سطح پر سیاسی اور سفارتی حمایت جاری رکھیں گے'۔
وفاقی وزیر نے اعلان کیا کہ کشمیریوں سے اظہار یکجہتی کا دن 'یوم یکجہتی کشمیر' دنیا بھر کے مختلف ممالک میں موجود پاکستان کے تمام سفارت خانوں میں منایا جائے گا جس کا مقصد بھارت کے زیر انتطام کشمیر کے عوام پر ہونے والے بھارتی فورسز کے مظالم کی نشاندہی کرنا ہے۔
انھوں نے کہا کہ کشمیری اقوام متحدہ کی منظور کردہ قرار دادوں پر عمل درآمد کا انتظار کررہے ہیں، انھوں نے عالمی برادری سے اقوام متحدہ کی قرار دادوں پر عمل درآمد کو یقینی بنانے کیلئے اپنا کردار ادا کرنے کا مطالبہ بھی کیا۔
انھوں نے اقوام متحدہ کی جنرل اسمبلی اور دیگر بین الاقوامی فورمز پر مسئلہ کشمیر اجاگر کرنے اور کشمیریوں پر بھارتی مظالم کی نشاندہی کرنے پر وزیراعظم نواز شریف کے اقدام کو سراہا۔
لائیو ٹی وی