26 ستمبر سے خواجہ آصف کی نااہلی پٹیشن پر سماعت کا آغاز

ملک اسد شائع September 24, 2017

اسلام آباد ہائی کورٹ کا 3 رکنی بینچ 26 ستمبر سے وزیر خارجہ خواجہ محمد آصف کے خلاف دائر نااہلی پٹیشن کی سماعت کرے گا۔

ڈان کی رپورٹ کے مطابق تین رکنی بینچ میں جسٹس عامر فاروق، جسٹس محسن اختر کیانی اور جسٹس میاں گل حسن اورنگزیب شامل ہیں، یہ تین رکنی بینچ پاکستان تحریک انصاف (پی ٹی آئی) کے امیدوار عثمان ڈار کی جانب سے دائر پٹیشن پر سماعت کرے گا، جو 2013 کے عام انتخابات میں خواجہ آصف کے مقابلے میں شکست سے دو چار ہوئے تھے۔

پی ٹی آئی کے عثمان ڈار کی جانب سے آئین کے آرٹیکل 62 اور 63 کے تحت خواجہ محمد آصف کو نااہل قرار دینے کے لیے دائر کی گئی درخواست میں الزام لگایا گیا تھا کہ وفاقی وزیر خارجہ نے متحدہ عرب امارات کی کمپنی میں ملازمت کے معاہدے اور اس سے حاصل ہونے والی تنخواہ کی تفصیلات ظاہر نہیں کیں۔

خیال رہے کہ جسٹس عامر فاروق نے مذکور پٹیشن پر پہلی سماعت 18 ستمبر کو کی تھی اور ابتدائی سماعت کے بعد مذکورہ پٹیشن کو لاجر بینچ کی تشکیل کے لیے چیف جسٹس اسلام آباد ہائیکورٹ کو بھجوا دیا تھا۔

جس پر گذشتہ روز چیف جسٹس اسلام آباد ہائی کورٹ نے 3 رکنی بینچ کا اعلان کردیا۔

پی ٹی آئی رہنما عثمان ڈار نے اپنی پٹیشن میں دعویٰ کیا کہ خواجہ محمد آٓصف 2011 سے متحدہ عرب امارات کی کمپنی (آئی ایم ای سی ایل) کے ساتھ خصوصی مشیر کے طور پر وابستہ ہیں۔

اس میں مزید کہا گیا کہ خواجہ محمد آصف آئی ایم ای سی ایل کے کُل وقتی ملازم ہیں اور انہیں ملازمت کے معاہدے کے مطابق ماہانہ 50 ہزار درہم تنخواہ جاری ہوتی ہے۔

یہ بھی پڑھیں: این اے 110 : خواجہ آصف کے خلاف درخواست خارج

مذکورہ پٹیشن میں تنخواہ ظاہر نہ کرنے پر سابق وزیراعظم نواز شریف کو سپریم کورٹ کی جانب سے نااہل قرار دینے کے فیصلے کا حوالہ دیا گیا۔

پٹیشن میں مزید کہا گیا کہ خواجہ محمد آصف نے یہ تنخواہ وصول کی جو ان کے لیے قابل قبول اثاثہ ہے، تاہم انہوں نے یہ تفصیلات 2013 کے عام انتخابات کے دوران قومی اسمبلی کے حلقہ این اے 110 کے لیے جمع کرائے گئے کاغذات نامزدگی میں ظاہر نہیں کیں۔

پٹیشنر نے دعویٰ کیا کہ انہیں حال ہی میں خواجہ محمد آصف کے اقامہ (ملازمت کا اجازت نامہ) اور تنخواہ کی تفصیلات کے بارے میں علم ہوا ہے جس پر خواجہ آصف کے خلاف اسلام آباد ہائی کورٹ سے رجوع کیا گیا۔

پٹیشن میں نشاندہی کی گئی کہ خواجہ محمد آصف کے اقامے کی حال ہی میں 29 جون 2017 کو تجدید کی گئی اور یہ 28 جون 2019 تک قابل استعمال ہے، اس سے یہ بات ظاہر ہوتی ہے کہ خواجہ محمد آصف آئی ایم ای سی ایل کے مستقل ملازم ہیں اور یہ پاکستان کے آئین کے تحت لیے گئے حلف کی خلاف ورزی ہے۔

پٹیشن میں کہا گیا کہ خواجہ محمد آصف اُس وقت بھی وفاقی وزیر برائے پانی و بجلی کے عہدے پر موجود تھے جب وہ 2013 میں اس کمپنی کے مستقل ملازمت تھے، جب کہ وہ اس سے قبل پی پی پی کے دورِ حکومت میں بھی ان کے اتحادی کے طور پر وفاقی وزیر کے عہدے پر فائز رہے۔

پٹیشنر کا کہنا تھا کہ دونوں مرتبہ خواجہ محمد آصف نے کاغذات نامزدگی جمع کراتے ہوئے اپنی ملازمت اور اس سے حاصل ہونے والی تنخواہ چھپائی۔