سرکاری اراضی پر 'قبضہ': (ن) لیگ کے سابق رکن قومی اسمبلی مدثر قیوم ناہرا گرفتار
محکمہ اینٹی کرپشن پنجاب نے کروڑوں روپے مالیت کی سرکاری اراضی پر قبضے کے الزام میں مسلم لیگ (ن) کے سابق رکن قومی اسمبلی مدثر قیوم ناہرا کو گرفتار کرلیا۔
ڈپٹی کمشنر گوجرانوالہ سہیل اشرف نے ڈائریکٹر اینٹی کرپشن کو ریفرنس بھیجا تھا کہ سابق رکن قومی اسمبلی مدثر قیوم ناہرا نے اربوں روپے مالیت کی 267 کنال سے زائد اراضی پر ناجائز قبضہ کر رکھا تھا، جس کو قابضین سے واگزار کروا لیا گیا ہے۔
محکمہ اینٹی کرپشن نے اس پر کارروائی کرتے ہوئے مسلم لیگ (ن) کے سابق رکن قومی اسمبلی مدثر قیوم ناہرا کو گرفتار کر لیا۔
مدثر قیوم ناہرہ پنجاب اسمبلی کے بھی رکن رہ چکے ہیں اور ان کے بھائی اظہر قیوم ناہرا نوشہرہ ورکاں سے (ن) لیگ کے رکن قومی اسمبلی ہیں۔
گرفتاری کے بعد اینٹی کرپشن دفتر میں میڈیا سے گفتگو کرتے ہوئے مدثر قیوم ناہرا نے کہا کہ ہم نے کسی سرکاری اراضی پر قبضہ نہیں کیا، سلیکٹڈ اور نالائق حکمران سمجھتے ہیں کہ اس طرح کے اوچھے ہتھکنڈوں سے ہم ڈر جائیں گے۔
انہوں نے کہا کہ پہلے سے زیادہ مضبوطی کے ساتھ نواز شریف کے ساتھ کھڑے ہیں، جھوٹے مقدمات سے کبھی نہیں دبے اور یہ چیزیں پہلے بھی دیکھیں اب بھی سامنا کریں گے۔
ان کا کہنا تھا کہ یہ سلیکٹڈ حکومت کی بوکھلاہٹ اور گھبراہٹ کا نتیجہ ہے، اگر سارے جلسے فلاپ ہیں تو یہ گرفتاریاں کرنے کی کیا ضرورت ہے۔
مریم نواز کا ردعمل
سماجی رابطے کی ویب سائٹ پر ٹوئٹ میں مریم نواز نے کہا کہ 'ریاستی مشینری کا ناجائز استعمال کرکے آپ لیگی عہدیداران کو بےقصور گرفتار تو کرسکتے ہیں، لیکن ووٹ کو عزت دو کے بیانیے کا عَلم تھامے ان نڈر اور بےباک سپاہیوں کو منزل تک پہنچنے سے ہرگز نہیں روک سکتے'۔
انہوں نے کہا کہ 'مدثر قیوم ناہرا کی گرفتاری واضح کرتی ہے کہ سلیکٹڈ حکومت عوامی قہر کے سامنے گھٹنے ٹیک چکی ہے'۔
لائیو ٹی وی