ملک کے مختلف اضلاع سے 14 ماحولیاتی نمونوں میں پولیو وائرس کی تصدیق
پاکستان میں پولیو کے خاتمے کی کوششیں ہر گزرتے دن کے ساتھ ماند پڑتی محسوس ہو رہی ہیں کیونکہ پاکستان کے مختلف اضلاع سے اکٹھا کیے گئے 14 ماحولیاتی نمونوں میں پولیو وائرس کی تصدیق ہوئی ہے۔
ڈان نیوز کے مطابق وزارت صحت کے ترجمان ساجد شاہ نے بتایا کہ ملک کے مختلف اضلاع سے اکٹھے کیے گئے ماحولیاتی نمونوں میں پولیس وائرس کی تصدیق ہوئی جو باعث تشویش بات ہے۔
انہوں نے بتایا کہ پشاور کے تین، حیدر آباد کے دو اور کراچی شرقی کے دو نمونوں میں پولیو وائرس پایا گیا ہے جبکہ اس کے علاوہ کراچی وسطی، کیماڑی اور غربی کے ایک، ایک نمونے میں بھی وائرس پایا گیا۔
ان کا کہنا تھا اس کے علاوہ سکھر، کوئٹہ، کوہاٹ اور اسلام آباد کے بھی ایک ایک نمونے میں پولیو وائرس رپورٹ ہوا۔
ترجمان ساجد شاہ کے مطابق تمام نمونوں میں پایا جانے والا پولیو وائرس سرحد پار سے آیا ہے۔
انہوں نے کہا کہ صرف پولیو ویکسینیشن کے ذریعے ہی بچوں کو محفوظ بنایا جاسکتا ہے اور والدین سے اپیل کی کہ 5سال سے کم عمر بچوں کو لازمی پولیو کے قطرے پلوائیں تاکہ پولیو وائرس کا خاتمہ ممکن بنایا جا سکے۔
لائیو ٹی وی