شاہین شاہ آفریدی نے مانچسٹر یونائیٹڈ کی نئے سیزن کی جرسی لانچ کردی
قومی ٹیم کے سابق کپتان اور فاسٹ باؤلر شاہین شاہ آفریدی نے انگلش پریمیئر لیگ اور دنیا کے مشہور فٹبال کلب مانچسٹر یونائیٹڈ کی نئے سیزن کے لیے جرسی لانچ کردی۔
بنگلہ دیش کے خلاف ٹیسٹ سیریز سے قبل چھٹیاں گزارنے والے قومی ٹیم کے فاسٹ باؤلر شاہین شاہ آفریدی انگلینڈ پہنچ گئے جہاں فٹبال کلب مانچسٹر یونائیٹڈ نے ان کا اولڈ ٹریفرڈ میں پرتپاک استقبال کیا۔
اس موقع پر شاہین شاہ آفریدی نے کلب کے ڈریسنگ روم اور گیلری کا دورہ کیا اور کلب کے اعلیٰ حکام سے بات چیت کی۔

اس موقع پر انہوں نے نئے سیزن سے قبل کلب کی کٹ کا اجرا کیا اور مشہور زمانہ اولڈ ٹریفرڈ اسٹیڈیم کا دورہ کر کے وہاں تصاویر بھی بنوائیں۔
مانچسٹر یونائیٹڈ نے کلب کے سوشل میڈیا پیج پر شاہین کی تصاویر اپ لوڈ کی جس کے ساتھ انگریزی میں تحریر کیا گیا ’ایگل ہیز لینڈڈ‘(شاہین پہنچ گیا ہے)۔

شاہین شرٹ پہنے اور ہاتھ تھامے دیکھا جا سکتا ہے جس ان کے نام کے ساتھ ساتھ کلب کا مشہور 10 نمبر بھی چسپاں ہے۔
کلب کا یہ مشہور 10نمبر ڈیوڈ بیکہم، وین رونی اور وین نیسٹل روئے جیسے مایہ ناز کھلاڑیوں کے پاس رہ چکا ہے۔