چیمپیئنز ٹرافی کی تاریخوں اور شیڈول میں تبدیلی کی رپورٹس گمراہ کن قرار
پاکستان کرکٹ بورڈ نے پاکستان میں آئندہ سال ہونے والی آئی سی سی چیمپئنز ٹرافی کی تاریخوں اور شیڈول میں تبدیلی کی میڈیا رپورٹس گمراہ قرار دیتے ہوئے مسترد کردیا۔
پاکستان اور بھارتی میڈیا کے کچھ حلقوں نے کل چیئرمین پی سی بی محسن نقوی کی گفتگو یہ تاثر لیا تھا کہ آئندہ سال پاکستان میں ہونے والی چیمپیئنز ٹرافی کے شیڈول کو تبدیل کیا جا سکتا ہے تاہم پاکستان کرکٹ بورڈ کی جانب سے ان رپورٹس کی تردید کردی گئی۔
پاکستان کرکٹ بورڈ کی جانب سے جاری بیان میں کہا گیا کہ یہ مایوس کن ہے کہ کچھ میڈیا آؤٹ لیٹس نے کل میڈیا سے ہونے والی پی سی بی کے چیئرمین محسن نقوی کی بات چیت کو غلط طریقے سے پیش کیا اور سیکیورٹی خدشات کی وجہ سے آئی سی سی چیمپئنز ٹرافی 2025 کی تاریخوں میں ممکنہ تبدیلی کے بارے میں گمراہ کن طور پر حوالہ دیا جس نے غیر ضروری سنسنی خیزی کو جنم دیا۔
ان کا کہنا تھا کہ میڈیا ٹاک کے دوران پی سی بی کے چیئرمین نے واضح طور پر کہا تھا کہ آئی سی سی چیمپیئنز ٹرافی 2025 کی میزبانی کے لیے تیاری کو یقینی بناتے ہوئے تینوں اسٹیڈیمز کی دوبارہ تعمیر اور دوبارہ ڈیزائن کو شیڈول کے مطابق مکمل کیا جائے گا۔
انہوں نے یہ بھی کہا تھا کہ جبکہ کچھ ڈومیسٹک میچوں کو بلاتعطل تعمیراتی کام کی سہولت کے لیے منتقل کرنے کی ضرورت پڑسکتی ہے لیکن یہ کسی بھی طرح سے آئی سی سی چیمپئنز ٹرافی سے متعلق نہیں ہے جو کہ آٹھ ٹیموں کے بین الاقوامی ایونٹ کے طور پر پی سی بی کی اولین ترجیح ہے۔
پی سی بی کی جانب سے جاری بیان میں کہا گیا کہ پی سی بی پاکستان کے تین مشہور وینیوز پر عالمی معیار کی آئی سی سی چیمپئنز ٹرافی 2025 کی میزبانی کے لیے پوری طرح پرعزم ہے، جو ہمارے پرجوش کرکٹ شائقین کو ایک ناقابل فراموش تجربہ فراہم کرے گا۔
اس حوالے سے بتایا گیا کہ چیمپیئنز ٹرافی کے انعقاد کے حوالے سے پی سی بی نے پہلے ہی انٹرنیشنل کرکٹ کونسل (آئی سی سی) کو ایک ڈرافٹ شیڈول پیش کر دیا ہے جس کی مجوزہ تاریخیں 19 فروری سے 9 مارچ 2025 تک ہیں۔
لائیو ٹی وی