مظاہرین کی اموات کے دعوے جھوٹے اور بے بنیاد ہیں، سیکیورٹی ذرائع
سیکیورٹی ذرائع نے اسلام آباد میں پاکستان تحریک انصاف (پی ٹی آئی) کے احتجاج کے خاتمے کے بعد سوشل میڈیا پر کیے جانے والے پروپیگنڈے کو مسترد کردیا۔
ڈان نیوز کے مطابق سیکیورٹی ذرائع کا کہنا ہے کہ چند لوگوں کی جانب سے جھوٹا پروپیگنڈا کیا جارہا ہے اور سوشل میڈیا پر مظاہرین کی اموات کا جھوٹا الزام لگایا جارہا ہے۔
سیکیورٹی ذرائع کا کہنا ہے کہ اپنی ناکامیوں اور کوتاہیوں کو چھپانےکے لیے سوشل میڈیا پر جھوٹا اور منفی پروپیگنڈا کیا جارہا ہے، پولیس اور رینجرز کے آپریشن میں کسی قسم کے آتشیں اسلحے کا استعمال نہیں کیا گیا۔
یاد رہے کہ رات گئے اسلام آباد کے ڈی چوک، بلیو ایریا اور جناح ایونیو کے اطراف رینجرز اور پولیس کے مشترکہ آپریشن کے بعد تحریک انصاف کے رہنما اور کارکن منتشر ہوگئے تھے جبکہ تحریک انصاف نے احتجاج ختم کرنے کا اعلان کردیا تھا۔
وزیراعلیٰ خیبرپختونخوا علی امین گنڈاپور، بشریٰ بی بی اور اپوزیشن لیڈر عمر ایوب مانسہرہ پہنچ گئے تھے جہاں بشریٰ بی بی اور علی امین گنڈاپور آج پریس کانفرنس کریں گے۔
واضح رہے کہ گزشتہ رات ڈی چوک سے پسپائی اختیار کرنے پر کارکنوں نے پی ٹی آئی کی قیادت پر شدید غم و غصے کا اظہار کیا تھا، اس دوران تحریک انصاف کی جانب سے احتجاج کے لیے خصوصی طور پر تیار کیے گئے کنٹینر میں آگ لگ گئی تھی۔
وزیر اطلاعات عطااللہ تارڑ نے رات گئے میڈیا سے گفتگو میں الزام عائد کیا تھا کہ تحریک انصاف نے اہم حکومتی شخصیات کو نشانہ بنانے کا منصوبہ بنایا تھا، ثبوت مٹانے کے لیے کنٹینر کو خود آگ لگائی گئی ہے، انہوں نے کنٹینر سے ملنے والے کاغذات کا فرانزک تجزیہ کرانے کا بھی اعلان کیا تھا۔
لائیو ٹی وی