کراچی: کارساز کے قریب ٹرک کی موٹر سائیکل کو ٹکر، خاتون جاں بحق، 4 افراد زخمی
کراچی کے علاقے کارساز میں ٹرک نے موٹر سائیکل کو ٹکر ماری ہے جس کے نتیجے میں خاتون جاں بحق ہوگئیں، حادثے میں دیگر 4 افراد زخمی بھی ہوئے ہیں جب کہ ڈائیور کو گرفتار کرلیا گیا ہے۔
ڈان نیوز کے مطابق کراچی کے علاقے کارساز میں ایک اور خوفناک حادثہ پیش آیا ہے، جہاں ایک مزدا ٹرک نے موٹر سائیکل کو ٹکر ماری ہے جس کے نتیجے میں خاتون موقع پر ہی جاں بحق ہوگئیں۔
پولیس نے بتایا ہے کہ ٹرک حادثے میں 4 افراد زخمی بھی ہوئے ہیں، خاتون کی لاش اور تمام زخمیوں کو جناح ہسپتال منتقل کردیا گیا ہے۔
پولیس کا کہنا تھا کہ حادثے کے ذمہ دار مزدا ڈرائیور محمد عالم کو گرفتار کرلیا گیا ہے اور ٹرک بھی قبضے میں لے لیا ہے جب کہ گرفتار ڈرائیور کے خلاف قانونی کارروائی کی جارہی ہے۔
واضح رہے کہ 19 اگست کو کراچی میں کارساز روڈ پر تیز رفتار گاڑی بے قابو ہو کر راہ گیروں پر چڑھ دوڑی تھی، حادثے میں باپ بیٹی جاں بحق اور 4 افراد زخمی ہوگئے تھے جبکہ پولیس نے گاڑی چلانے والی خاتون کو گرفتار کرلیا تھا۔
حادثے میں موٹر سائیکل سوار عمران عارف اور اس کی بیٹی آمنہ جاں بحق جب کہ 4 شہری شدید زخمی ہوئے، عینی شاہدین نے بتایا تھا کہ جیپ چلانے والی خاتون اپنے حواس میں نہیں تھیں۔
بعد ازاں، کارساز حادثہ کیس کی مرکزی ملزم نتاشا دانش اور جاں بحق ہونے والے دو افراد کے لواحقین کے درمیان معاہدہ ہوگیا تھا۔
لائیو ٹی وی