سعودی عرب: موبائل چارجر پھٹنے سے گھر میں آگ لگ گئی، خاندان کے 7 افراد جاں بحق
سعودی عرب کے شہر الاحسا میں موبائل چارجر پھٹنے سے گھر میں آتشزدگی کے نتیجے میں ایک ہی خاندان کے 7 افراد جاں بحق ہوگئے۔
اردو نیوز کی رپورٹ کے مطابق یہ واقعہ سعودی عرب کے نخلستانی شہر میں اس وقت پیش آیا جب خاندان کے تمام افراد رات کو سوچکے تھے اور موبائل چارجر بجلی کے ساکٹ میں لگا ہوا تھا، گرم ہونے کی وجہ سے چارجر پھٹ گیا اور آگ لگ گئی جو دیکھتے ہی دیکھتے پورے گھر میں پھیل گئی، جب تک خاندان کے لوگوں کی آنکھ کھلی تو آگ کافی پھیل چکی تھی۔
رپورٹ کے مطابق خاندان کے سربراہ اور ان کی اہلیہ نے آگ بجھانے کی کوشش کی مگر دونوں زخمی ہوگئے جبکہ کمروں میں سوئے ہوئے بچوں کا دھویں کی وجہ سے دم گھٹ گیا اور ان کی موت واقع ہوگئی۔
محکمہ شہری دفاع کو اطلاع ملی تو فوری طور پر متعدد ٹیمیں موقع پر پہنچیں مگر اس وقت تک دم گھٹنے سے 7 افراد چل بسے تھے۔
سعودی شہری دفاع نے کہا ہے کہ کسی بھی گھر میں آگ لگنے کی صورت میں اسے بجھانے میں مصروف ہونے کے بجائے وہاں موجود افراد کو بچانے کی فکر کی جائے اورفوری طور پر گھر خالی کیا جائے۔
محکمے نے کہا ہے کہ آتشزدگی میں دھواں زہر کا کام کرتا ہے، بیشتر ہلاکتیں دھواں سانس کے ذریعے جسم کے اندرونی اعضا میں داخل ہونے سے ہوتی ہیں۔
لائیو ٹی وی