لاہور: ٹک ٹاک ویڈیو بنانے کے دوران پستول سے اچانک گولی چل گئی، نوجوان ہلاک
لاہور میں ایک لڑکا ٹک ٹاک ویڈیو بنانے کے دوران پستول سے اچانک گولی چلنے کے نتیجے میں ہلاک ہوگیا۔
ڈان نیوز کے مطابق پنجاب کے دارالحکومت، لاہور کے علاقے شاد باغ میں افسوس ناک واقعہ پیش آیا، جہاں ٹک ٹاک بنانےکا شوق ایک اور زندگی نگل گیا۔
پولیس حکام کے مطابق عبدالرحمٰن نامی لڑکا ٹک ٹاک بناتے ہوئے پستول سے اچانک گولی چلنے سے زندگی کی بازی ہار گیا، واقعےکی اطلاع ملتے ہی متعلقہ پولیس موقع پرپہنچ گئی تھی۔
ٹک ٹاک بنانے کے دوران جاں بحق ہونے والے عبدالرحمٰن کی لاش کو پوسٹ مارٹم کے لیے مردہ خانےمنتقل کیا گیا، تاہم اہل خانہ نے کسی بھی قانونی کارروائی سے انکار کر دیا۔
پولیس کے مطابق جاں بحق ہونے والا لڑکا مزنگ کا رہائشی تھا، اور وسن پورہ اپنے ماموں کےگھر آیا ہوا تھا، جہاں ٹک ٹاک بنانے کے دوران گولی لگنے سے اپنی زندگی گنوا بیٹھا۔
یاد رہے کہ مئی 2024 میں کراچی کے علاقے لیاقت آباد کے کال سینٹر ٹک ٹاک ویڈیو بناتے ہوئے نوجوان عبداللہ ہلاک ہوگیا تھا، جس کا مقدمہ لیاقت آباد تھانے میں درج کرلیا گیا تھا۔
مدعی مقدمہ محمد علی نے موقف اپنایا تھا کہ میرا بیٹا پیپر دینے کے بعد ساڑھے 12 بجے گھر آیا اور پھر ظہر کی نماز پڑھنے کے لیے نکلا، لیکن واپس گھر نہیں آیا، ہم اس کے کال سینٹر پہنچے تو وہاں پولیس موجود تھی، ہمیں بتایا گیا کہ آپ کا بیٹا گولی لگنے سے جاں بحق ہوچکا ہے۔
لائیو ٹی وی