برطانیہ میں 4 ماہ کے دوران منکی پاکس کے ’کلیڈ ایل بی‘ ویرینٹ کا آٹھواں کیس رپورٹ
برطانیہ کی ہیلتھ سیکیورٹی ایجنسی (یو کے ایچ ایس اے) نے کہا ہے کہ انگلینڈ میں منکی پاکس (ایم پاکس) کے ویرینٹ ’کلیڈ ایل بی‘ کا ایک اور کیس سامنے آیا ہے، جو گزشتہ سال اکتوبر کے بعد سے ملک میں تصدیق شدہ آٹھواں کیس ہے۔
ڈان اخبار میں شائع غیر ملکی خبر رساں اداروں کی رپورٹ کے مطابق سرکاری ادارے کا کہنا ہے کہ آبادی کے لیے خطرہ کم ہے، کلیڈ ایل بی ویرینٹ وائرس کی ایک نئی شکل ہے جس کا تعلق اگست میں ڈبلیو ایچ او کی طرف سے اعلان کردہ عالمی صحت کی ہنگامی صورتحال سے ہے۔
یو کے ایچ ایس اے کا کہنا ہے کہ لندن میں ایک ایسے مریض میں نیا کیس سامنے آیا ہے جو حال ہی میں یوگینڈا سے واپس آیا تھا، جہاں اس قسم کی کمیونٹی ٹرانسمیشن دیکھی جا رہی ہے، تاہم اس کا انگلینڈ میں شناخت کیے گئے پچھلے کیسز سے کوئی تعلق نہیں ہے۔
یو کے ایچ ایس اے نے کہا کہ افریقہ کے کچھ حصوں میں پھیلاؤ کے تناظر میں ہم توقع کرتے ہیں کہ برطانیہ میں کبھی کبھار کلیڈ ایل بی منکی پاکس کا درآمد شدہ کیس دیکھنے کو ملے گا۔
پہلا کیس اکتوبر میں لندن میں سامنے آیا تھا، جس کے بعد کے 3 کیسز میں مریض کے گھریلو رابطوں کے متاثرہ افراد شامل تھے، بعد ازاں اکتوبر میں لیڈز میں پانچواں کیس سامنے آیا تھا، جب کہ جنوری میں باقی کیسز کا پتا چلا تھا۔
لائیو ٹی وی