کراچی تا پشاور ریلوے لائن کی اپ گریڈیشن کا منصوبہ جلد شروع ہونے کا امکان
چین۔پاکستان اقتصادی راہداری (سی پیک) کے تحت کراچی سے لے کر پشاور تک ریلوے لائن کی اپ گریڈیشن کے منصوبے پر جلد کام شروع کرنے کی راہ ہموار ہوگئی۔
ڈان نیوز کے مطابق چینی ماہرین کا وفد رواں ماہ کے آخر میں پاکستان کا دورہ کرے گا، جس میں ایم ایل ون منصوبے کے مالیاتی پلان کو حتمی شکل دی جائے گی۔
وفاقی کابینہ نے اگست 2024 میں ایم ایل ون منصوبے کے پہلے مرحلے پر مذاکرات شروع کرنے کی منظوری دی تھی۔
حکومتی ذرائع کے مطابق ایم ایل ون منصوبے کے لیے 85 فیصد یا 5 ارب 70 کروڑ ڈالر کا فنڈ چین کی جانب سے فراہم کیے جانےکا امکان ہے۔
ذرائع نے بتایا کہ ایم ایل ون منصوبہ 7 سال میں فروری 2032 تک مکمل کرنے کا تخمینہ لگایا گیا ہے۔
منصوبے کے تحت کراچی سے پشاور تک 1726 کلومیٹر ڈبل ٹریک کو اپ گریڈ کیا جائے گا، جس کے بعد شہریوں کو ملک کے ایک کونے سے دوسرے کونے تک سفر کرنے کے دوران وقت کی بچت ہوگی، ریلوے کی جانب سے سامان کی نقل و حرکت میں بھی کم وقت صرف ہوگا۔
یاد رہے کہ گزشتہ ماہ پاکستان نے چین سے کہا تھا کہ وہ 10 ارب ڈالر کی کراچی تا پشاور ریلوے لائن (ایم ایل ون) کے پہلے مرحلے میں کراچی اور اسلام آباد میں 2 ماڈل اسپیشل اکنامک زونز (ایس ای زیڈز) کی تعمیر کے معاہدے کو حتمی شکل دینے کے لیے اپنی تکنیکی اور مالیاتی ٹیموں کے دورہ پاکستان میں تیزی لائے۔
قبل ازیں جون 2024 میں وزیر اعظم شہباز شریف کے دورہ چین میں ’ایم ایل ون‘ منصوبے کے مالی معاملات طے پائے تھے۔
لائیو ٹی وی