امریکا: برڈ فلو کے باعث قیمتیں بڑھنے پر اسٹور سے ایک لاکھ انڈے چوری
امریکی ریاست پنسلوانیا میں برڈ فلو کی وبا پھیلنے کے بعد قیمتوں بڑھنے پر چوروں نے گروسری اسٹور سے 40 ہزار ڈالر مالیت کے ایک لاکھ انڈے چوری کرلیے۔
برطانوی نشریاتی ادارے کی رپورٹ کے مطابق امریکی ریاست پنسلوانیا میں چوروں نے ایک گروسری اسٹور سے ایک لاکھ سے زائد انڈے چوری کر لیے جن کی مالیت 40 ہزار ڈالر ہے۔
پولیس کا کہنا ہے کہ چوروں نے یکم فروری کو گرین کاسل میں پیٹ اینڈ گیری آرگینیکس میں ایک لاری کے پچھلے حصے کو نشانہ بنایا تھا۔
یہ واقعہ ایسے وقت میں سامنے آیا ہے جب برڈ فلو کی وبا کے دوران انڈوں کی قیمت میں اضافہ ہوا ہے ، جس سے وہ غیر متوقع طور پر مہنگے ہوگئے ہیں۔ امریکی چین وافل ہاؤس نے حال ہی میں اپنے انڈوں کی قیمت میں اضافہ کیا ہے۔
امریکی حکومت کے اعداد و شمار کے مطابق گزشتہ سال انڈوں کی قیمتوں میں 65 فیصد سے زائد اضافہ ہوا ہے، محکمہ زراعت نے پیش گوئی کی ہے کہ 2025 میں انڈوں کی لاگت میں تقریباً 20 فیصد اضافہ ہوگا۔
منگل کو وافل ہاؤس نے صارفین کو آگاہ کیا ہے کہ فی انڈہ 0.50 ڈالر سرچارج وصول کیا جائے گا، امریکی ڈائنر چین نے اسے انڈوں کی قیمتوں میں غیر معمولی اضافے سے منسلک عارضی ٹارگٹڈ سرچارج قرار دیا ہے۔
محکمہ زراعت کے مطابق برڈ فلو کی وبا 2022 میں شروع ہوئی تھی اور حالیہ مہینوں میں یہ وبا امریکا بھر میں پھیلی ہے۔
محکمے نے نوٹ کیا ہےکہ صرف دسمبر میں قیمتوں میں 8 فیصد سے زیادہ اضافہ ہوا، اعداد و شمار سے یہ بھی پتہ چلتا ہے کہ دسمبر 2023 میں ایک کارٹن کی اوسط قیمت 2.51 ڈالر تھی جو کہ ایک سال بعد 4.15 ڈالر تک پہنچ گئی، اس اضافے سے کچھ اسٹورز میں الماریاں خالی ہوگئی ہیں۔
امریکا بھر میں پرندوں، مویشیوں اور ممالیہ جانوروں میں برڈ فلو کی وبا پھیلی ہے،حالانکہ انسانوں میں یہ انفیکشن بہت کم ہوتا ہے۔
لائیو ٹی وی