سونے پھر مہنگا، تاریخ میں پہلی بار فی تولہ قیمت 3 لاکھ روپے کے قریب پہنچ گئی
سونے کی قیمتوں میں ریکارڈ اضافے کا رجحان جاری ہے، آج فی تولہ قیمت یکدم 5 ہزار 300 روپے بڑھ کر ملکی تاریخ میں پہلی بار 3 لاکھ روپے کے قریب پہنچ گئی۔
سرکاری خبر رساں ادارے ’اے پی پی‘ کے مطابق جیولرز ایسوسی ایشن نے رپورٹ کیا کہ 24 قیراط کے حامل خالص سونے کے نرخ 5 ہزار 300 روپے کے بڑے اضافے سے 2 لاکھ 99 ہزار 600 روپے کی نئی بُلند ترین سطح پر پہنچ گئے۔
اسی طرح 24 قیراط 10 گرام سونا 4 ہزار 158 روپے بڑھ کر 2 لاکھ 56 ہزار 859 روپے میں فروخت ہوا، جبکہ 22 قیراط کے 10 گرام سونے کے دام 2 لاکھ 35 ہزار 454 روپے ریکارڈ کیے گئے۔
فی تولہ چاندی کی قیمت بھی 36 روپے بڑھ کر 3 ہزار 350 روپے جبکہ 10 گرام کے نرخ 31 روپے اضافے سے 2 ہزار 872 روپے ریکارڈ کیے گئے۔
ایسوسی ایشن نے رپورٹ کیا کہ عالمی مارکیٹ میں سونے کی فی اونس قیمت 53 ڈالر اضافے سے 2 ہزار 868 ڈالر ہوگئی۔
واضح رہے کہ گزشتہ روز (4 فروری) بھی ملک بھر میں سونے کی قیمتیں بُلندی پر پہنچنے کا سلسلہ جاری رہا تھا اور فی تولہ قیمت ایک ہزار 900 روپے بڑھ کر 2 لاکھ 94 ہزار 300 روپے تک جاپہنچی تھی۔
اس سے قبل 31 جنوری کو سونے کے نرخ 2 لاکھ 91 ہزار 800 روپے کی نئی بلند ترین سطح پر ریکارڈ کیے گئے تھے اور یہ سلسلہ یکم فروری (بروز ہفتہ) کے بعد گزشتہ روز (3 فروری) کو بھی جاری رہا تھا جب فی تولہ دام 2 لاکھ 92 ہزار 400 کی بُلند سطح پر پہنچے تھے۔
لائیو ٹی وی